რუსეთი გამოდის ინიციატივით, ნატო-სთან ერთად მომზადდეს შეთანხმება, რომელიც გამორიცხავს აღმოსავლეთით ალიანსის გაფართოვებას - ზახაროვა

რუსეთი გამოდის ინიციატივით, ნატო-სთან ერთად მომზადდეს ერთობლივი შეთანხმება, რომელიც გამორიცხავს აღმოსავლეთით ალიანსის გაფართოვებას და რუსეთის საზღვრებთან შეიარაღების სისტემების განთავსებას. ამის შესახებ რუსეთის საგარეო საქმეთა სამინისტროს წარმომადგენელმა მარია ზახაროვამ რიგაში ნატო-ს საბჭოს ორდღიანი სამიტის დასრულების შემდეგ განაცხადა.  

 „დარწმუნებულები ვართ, რომ შექმნილი სიტუაციის მოგვარების ერთადერთი ვარიანტი - ეს არის გრძელვადიანი შეთანხმების მომზადება, რომელიც გამორიცხავს ნატო-ს ნებისმიერ შემდგომ გაფართოვებას აღმოსავლეთით და რუსეთის ტერიტორიების სიახლოვეს ჩვენთვის საფრთხის შემცველი შეიარაღების სისტემების განლაგებას“, - განაცხადა ზახაროვამ.

ამასთან, ზახაროვამ განაცხადა, რომ მოსკოვისთვის წითელ ხაზად რჩება ნატო-ში უკრაინის მიღება.

 „ალიანსის სამხედრო ორბიტაზე კიევის წინსვლის გაგრძელება, ნატო-ს მიერ ამ ქვეყნის სამხედრო ინფრასტრუქტურის დე-ფაქტო ათვისება, სწრაფვა აქციოს ის რუსეთის საწინააღმდეგო პლაცდარმად, რომელსაც სერიოზული ნეგატიური შედეგები მოჰყვება, შექმნის ევროპაში სამხედრო პოლიტიკური ვითარების დესტაბილიზაციას“, - განაცხადა ზახაროვამ.

ამასთან, ზახაროვამ დასძინა, რომ ცივი ომის დასრულების შემდეგ რუსეთს არწმუნებდნენ, რომ ნატო-ს იურისდიქცია და სამხედრო ძალები აღმოსავლეთის მიმართულებით წინ ერთი დიუმითაც არ წაიწევდა. მისი თქმით, დღეს ყველა დაპირება დავიწყებულია და შესრულებელი.

ზახაროვამ უარყო უკრაინის წინააღმდეგ რუსეთის მოსალოდნელი აგრესია და აღნიშნა, რომ „სწორედ ნატო მიუახლოვდა რუსეთს, ატარებს წვრთნებს და ზრდის სამხედრო ინფრასტრუქტურას რუსეთის საზღვრებთან“.