კოალიციის ერთიანობა არ არის დამოკიდებული რაიმე განცხადებებზე - დავით უსუფაშვილი

”კოალიციის ერთიანობა არ არის დამოკიდებული რაიმე განცხადებებზე. ამას გაცილებით უფრო სერიოზული წინაპირობები და საფუძვლები გააჩნია," - ამ განცხადებით პარლამენტის თავმჯდომარე, დავით უსუფაშვილი, გოგი თოფაძის მიერ თავდაცვის მინისტრთან დაკავშირებით გაკეთებულ განცხადებებს, სადაც ის თინა ხიდაშელს საგარეჯოს მაჟორიტარული არჩევნების გაყალბებაში ადანაშაულებს, გამოეხმაურა. 

დავით უსუფაშვილი აქცენტს იმაზე აკეთებს, რომ “ბატონი თოფაძე ბრძანებს, მას ეს ასე არ უთქვამს” და განმარტავს, რომ კოალიციის ერთიანობას ასეთი განცხადებები ხელს ვერ შეუშლის. 

“კოალიციის ერთიანობა არ არის დამოკიდებული რაიმე განცხადებებზე. ამას გაცილებით უფრო სერიოზული წინაპირობები და საფუძვლები გააჩნია. რაც შეეხება კონკრეტულ განცხადებას, რომელზედაც თქვენ მიმითითებთ, ამის თაობაზე ბატონი თოფაძე ბრძანებს, რომ მას ეს ასე არ უთქვამს. მე ახლა უფრო იმას ველი, რომ ის მედიასაშუალება, რომელმაც ეს ინფორმაცია გაავრცელა, რას გვეუბნება და რითი გვიმტკიცებს, რომ მან ეს თქვა თუ არ თქვა. სანამ ეს არ გაირკვევა, მე მანამდე სხვა ვერანაირ კომენატრს ვერ გავეკეთებ იმიტომ, რომ რასთან გვაქვს საქმე, არ ვიცი,” - აღნიშნა პარლამენტის თავმჯდომარემ.