ყაზახეთში, აქციების დროს 6 ათასამდე ადამიანი დააკავეს

ყაზახეთში, აქციების დაწყებიდან 6 ათასამდე ადამიანია დაკავებული. პრეზიდენტის ადმინისტრაციის განცხადებით, „დაკავებულთა შორის არიან უცხო ქვეყნის მოქალაქეები“.

ქვეყნის შინაგან საქმეთა სამინისტროს განცხადებით, აქციების მიმდინარეობისას დაკავებულია  5 969 ადამიანი.

უწყების მტკიცებით, ყაზახეთის ყველა რეგიონში სიტუაცია სტაბილურია.

მედიის ცნობით, ქალაქ ალმათის სხვადასხვა რაონში კვლავ სროლის ხმა ისმის.

ყაზახეთის შინაგან საქმეთა სამინისტროს თანახმად, დემონსტრანტებთან დაპირისპირებაში დაიღუპა 16 სამართალდამცველი და დაშავდა 1 300.

შეგახსენებთ, ყაზახეთი საპროტესტო ტალღამ მოიცვა. მასობრივი საპროტესტო აქციები გაზის გაზრდილი ფასის გამო 2 იანვარს, ქვეყნის სამხრეთ-დასავლეთით მდებარე რეგიონში დაიწყო. მოგვიანებით, საპროტესტო აქციები მთელი ქვეყნის მასშტაბით მასობრივ დემონსტრაციებში გადაიზარდა, სადაც გაჩნდა ეკონომიკური და პოლიტიკური მოთხოვნები.

მწვავე პროტესტების ფონზე გადადგა ქვეყნის მთავრობა.

4 და 5 იანვარს ვითარება განსაკუთრებით დაიძაბა ქალაქ ალმათში, სადაც დემონსტრანტებისა და უსაფრთხოების ძალების შეტაკებები გაიმართა. იუწყებიან, რომ შეტაკებებს ათეულობით დემონსტრანტი ემსხვერპლა, დაღუპულია 10-ზე მეტი პოლიციელი.

პრეზიდენტმა ყასიმ ჟომართ-თოყაევმა აქციის მონაწილეებს ტერორისტები უწოდა და მათი თავდასხმა ყაზახეთზე განხორციელებულ აგრესიის აქტად შეაფასა. თოყაევმა მითითება მისცა სამართალდამცავებს, რომ დემონსტრანტებს ცეცხლი გაუფრთხილებლად გაუხსნან.

თოყაევმა დახმარების თხოვნით კოლექტიური უსაფრთხოების ხელშეკრულების ორგანიზაციას მიმართა, რის შემდეგაც, ქვეყანაში ორგანიზაციის წევრი ქვეყნების სამხედროები განთავსდნენ. კოლექტიური სამშვიდობო ძალების კონტინგენტში რუსეთის, ბელარუსის, სომხეთის, ტაჯიკეთისა და ყირგიზეთის დანაყოფები შედიან.