უკრაინა კიევიდან დიპლომატების ოჯახების ევაკუაციის გადაწყვეტილებას ნაადრევს უწოდებს

უკრაინის საგარეო საქმეთა სამინისტრო აშშ-ის სახელმწიფო დეპარტამენტის გადაწყვეტილებას საელჩოს თანამშრომელთა ოჯახების ევაკუაციის თაობაზე ნაადრევს უწოდებს და აღნიშნავს, რომ უსაფრთხოების თვალსაზრისით ცვლილებები არ მომხდარა.

"პატივს ვცემთ უცხო სახელმწიფოების უფლებას, უზრუნველყონ თავიანთი დიპლომატიური მისიების უსაფრთხოება, თუმცა, მიგვაჩნია, რომ ამერიკული მხარის ასეთი ნაბიჯი ნაადრევი და სიფრთხილის გადაჭარბებული გამოვლინებაა. ფაქტობრივად, ბოლო ხანებში, უსაფრთხოების თვალსაზრისით კარდინალური ცვლილებები არ მომხდარა. რუსული აგრესიის საფრთხე ჯერ კიდევ 2014 წლიდან მომდინარეობს, ხოლო სახელმწიფო საზღვრებთან რუსი სამხედროების მობილიზაცია გასული წლის აპრილში დაიწყო", - განაცხადა სამინისტროს პრესსპიკერმა.

მან ასევე განმარტა, რომ სახელმწიფო დეპარტამენტის გადაწყვეტილება არ გულისხმობს საელჩოს ყველა თანამშრომლის ევაკუაციას.

"საელჩო აგრძელებს მუშაობას და თანამშრომლებს სურვილის შემთხვევაში შეუძლიათ ქვეყნის დატოვება", - დასძინა მან.

პრესსპიკერის განცხადებით, რუსეთის ფედერაცია აქტიურ ძალისხმევას ეწევა უკრაინის შიდა სიტუაციის ასარევად.

"უკრაინულ და საერთაშორისო მედიაში ვრცელდება ჭარბი რაოდენობით დეზინფორმაცია, მანიპულირება და ფეიკ ნიუსები, რათა დათესონ პანიკა უკრაინელებსა და უცხო ქვეყნის მოქალაქეებში, დააშინონ ბიზნესი და ძირი გამოუთხარონ ეკონომიკურ და ფინანსურ სტაბილურობას. ასეთ ვითარებაში მნიშვნელოვანია რისკების შეფასება და სიმშვიდის შენარჩუნება", - დასძინა საგარეო საქმეთა სამინისტროს პრეესპიკერმა ოლეგ ნიკოლენკომ.

ამავე დროს, ნიკოლენკომ მადლობა გადაუხადა აშშ-ის მთავრობას დიპლომატიური მხარდაჭერისა და სამხედრო დახმარების გაწევისთვის.

შეგახსენებთ, რუსეთის მიერ უკრაინაში შესაძლო სამხედრო აგრესიის ფონზე, შეერთებული შტატების სახელმწიფო დეპარტამენტმა განკარგულება გამოსცა, რომლის თანახმადაც უკრაინაში აშშ-ის საელჩოს თანამშრომლების ოჯახის წევრებმა უკრაინა უნდა დატოვონ.

მოგვიანებით, გავრცელდა ცნობა, რომ კიევიდან საელჩოს თანამშრომელთა ნაწილის გაყვანა ბრიტანეთმაც დაიწყო.

ამ ინფორმაციის კვალდაკვალ, ევროკავშირმა განაცხადა, რომ კიევიდან დიპლომატების ოჯახების ევაკუაციას არ გეგმავს.