სტამბოლში საქართველოს მოქალაქეებს შორის დაპირისპირების შედეგად მოკლულია ერთი, ხოლო დაჭრილია 2 ადამიანი

თურქეთში, ქალაქ სტამბოლში ქართველებს შორის დაპირისპირების შედეგად მოკლულია 32 წლის გიორგი სიხარულიძე. შემთხვევა 30 იანვარს გვიან ღამით მოხდა.

მკვლელობაში ბრალდებული 45 წლის ზვიად ბულია თურქეთის პოლიციამ უკვე დააკავა.

შემთხვევა იმ დროს მოხდა, როცა ქართველები სუფრაზე იმყოფებოდნენ. "მთავარი არხის" ინფორმაციით, ხვიჩა წიფურიასა და ზვიად ბულიას შორის შელაპარაკება მოხდა, ბულიამ მას დანა მოუქნია, რომელიც გვერდით მჯდომ გიორგი სიხარულიძეს მოხვდა.

სიხარულიძე საავადმყოფოში მიყვანამდე გარდაიცვალა. იმ დროს კი, როცა სხვები დაშავებულის დახმარებას ცდილობდნენ, ბულიამ წიფურიაც დაჭრა და მიიმალა.

არსებული ინფორმაციით, ის შემოვლითი გზით საქართველოში გადმოსვლას ცდილობდა. მის დაკავებას ოჯახი ადასტურებს.

 დაჭრილ ხვიჩა წიფურიას სიცოცხლეს საფრთხე არ ემუქრება.