ლავროვმა ბრიტანელ კოლეგასთან შეხვედრას "მუნჯის საუბარი ყრუსთან" უწოდა

მოსკოვში რუსეთის საგარეო საქმეთა მინისტრმა სერგეი ლავროვმა და დიდი ბრიტანეთის საგარეო საქმეთა მდივანმა ლიზ ტრასმა მოლაპარაკებები გამართეს.

რუსი და ბრიტანელი დიპლომატების შეხვედრა უკრაინის ირგვლივ არსებული მწვავე ვითარების ფონზე გაიმართა. როგორც ჩანს შეხვედრაც დაძაბულ რეჟიმში წარიმართა, რასაც ლავროვისა და ტრასის მიერ პრესისთვის გაკეთებული განცხადებებ ცხადჰყოფენ.

ლავროვმა შეხვედრას "იმედგამაცრუებელი" უწოდა და ამავე დროს განაცხადა, რომ რუსეთთან მიმართებით [დასავლეთის] ულტიმატუმისა და მუქარის შემცველი განცხადებები არის გზა, რომელიც არსაით მიდის.

ლავროვმა ბრიტანელ კოლეგასთან უკრაინის საკითხზე შეხვედრას "მუნჯის საუბარი ყრუსთან" უწოდა.

"სიმართლე გითხრათ, იმედგაცრუებული ვარ. ჩვენ მუნჯისა და ყრუს საუბარი გამოგვდის. თითქოს ერთმანეთს ვუსმენთ, მაგრამ ერთმანეთის არ გესმის. ყოველ შემთხვევაში ჩვენი დეტალური განმარტებები მოუმზადებელ ნიადაგზეა. დაახლოებით, ისე, როგორც ამბობენ, რომ რუსეთი ელოდება, როდის გაიყინება მიწა და როდის გახდება ქვასავით, რათა ტანკებმა უკრაინის ტერიტორიაზე მშვიდად გაიარონ", - თქვა ლავროვმა პრესკონფერენციაზე.

მისი თქმით, ბრიტანელებს არ სურთ რუსეთის არგუმენტების მოსმენა.

თავის მხრივ, თრასმა განაცხადა, რომ „რუსეთს ჯერ კიდევ აქვს შესაძალებლობა შეაჩეროს ურაინის მიმართ აგრესია და დიპლომატიური გზით ურთიერთობის დარეგულირებას მიმართოს“.

 „ფაქტები თავად მეტყველებენ ყველაფერზე. ჩვენ ვხედავთ უკრაინის საზღვართან ჯარისა და შეიარაღების გაზრდას და მიგვაჩნია რომ ეს საფრთხეა. ჩვენ ასევე ვაკვირდებით ჰიბრიდულ კიბერომს და სხვა სახის ომებს, რომლებიც მიმართულია იქითკენ, რომ უკრაინაში დემოკრატიას ძირი გამოუთხაროს“, - განაცხადა ლიზ თრასმა.