ჰააგის ტრიბუნალი 2008 წლის აგვისტოს ომის საქმეზე დაკავების ორდერებს გამოსცემს

საქართველო, თბილისი - 00:16 | 11.03.2022

ნანახია: 1121

ჰააგის სისხლის სამართლის საერთაშორისო სასამართლოს (ICC) პროკურორი კარიმ ხანი აცხადებს, რომ შეიტანა განცხადება სამხრეთ ოსეთის 3 წარმომადგენლის დაკავების ორდერის მოთხოვნით.

კარიმ ხანის განცხადებით, დაკავების ორდერების მოთხოვნას აქვს საფუძვლიანი დასაბუთება, რომ ამ პირებს ეკისრებათ სისხლის სამართლებრივი პასუხისმგებლობა ომის დანაშაულებზე 2008 წლის 8 აგვისტოდან 28 აგვისტომდე.

დაკავების ორდერების გამოცემა მოთხოვნილია პირებზე:

გენერალ-ლეიტენანტი მიხეილ მინძაევი, დე ფაქტო სამხრეთ ოსეთის შინაგან საქმეთა მინისტრი 2005-2008 წლებში;

ჰამლეტ გუჩმაზოვი, დე ფაქტო შინაგან საქმეთა სამინისტროს წინასწარი დაკავების დაწესებულების უფროსი გამოძიების ქვეშ მყოფი პერიოდისთვის;

დავით სანაკოევი, დე ფაქტო პრეზიდენტის წარმომადგენელი ადამიანის უფლებათა დაცვის საკითხებში.

პროკურორის თქმით, ამ პირებს ეკისრებათ სისხლის სამართლებრივი პასუხისმგებლობა ადამიანების უკანონოდ დაპატიმრებაში, წამებაში, არაადამიანურ მოპყრობაში, პირადი ღირსების შეურაცხყოფასა და მძევლების აყვანაში.