ღარიბაშვილის განცხადებით, გუშინ საწვავის ფასის გამო გამართული აქციების უკან "ნაციონალური მოძრაობა" იდგა

გუშინ გარკვეული აქციები იქნა ორგანიზებული, რომლის უკან იდგა პირდაპირ უნდა ითქვას, ნაციონალური მოძრაობა, - განაცხადა მთავრობის სხდომაზე პრემიერ-მინისტრმა, ირაკლი ღარიბაშვილმა.

"გუშინ ჩვენ ვნახეთ, რომ გარკვეული აქციები იქნა ორგანიზებული, რომლის უკან იდგა პირდაპირ უნდა ითქვას, რომ ნაციონალური მოძრაობა. მე მესმის, რომ ჩვენ მოქალაქეებს ძალიან აწუხებთ ფასები და რა თქმა უნდა ჩვენ ყველანი ვართ დაინტერესებული, რომ შევუმსუბუქოთ ჩვენ მოქალაქეებს ის გაზრდილი ფასები და წნეხი, რომელიც მომდინარეობს ამ კრიზისებიდან", - თქვა ღარიბაშვილმა.

მისი თქმით, პანდემიის გამო ინფლაციის მაჩვენებლებმა არაერთ ქვეყანაში ბოლო წლების და ათწლეულების რეკორდულ დონეს მიაღწია. ღარიბაშვილმა თქვა, რომ ოპონენტები უპასუხისმგებლოდ საუბრობენ და ცდილობენ მოქალაქეები შეცდომაში შეიყვანონ.

"მათ პერიოდში წლიური ინფლაცია 2011 წლის მაისში იყო 14.3%, იმავე წლის მარტში 13.9%, აპრილში 13.5% უფრო ადრეც, ინფლაცია შეადგენდა 14.5% 2006 წელს მაგალითად, საშუალო წლიური ინფლაცია წინა ხელისუფლების, შეწონილი რომ შევახსენოთ ჩვენ მოქალაქეებს, იყო 6.2.% მაშინ, როცა ჩვენ დროს, 9 წლიან პერიოდში 4.1%-ია საერთო შეწონილი წლიური ინფლაცია", - თქვა მან.