ნიკა კვარაცხელიას მკვლელობის საქმეზე აკო ჭელიძეს 17, გიორგი კავილაძეს კი 16 წლით თავისუფლების აღკვეთა მიესაჯათ

ნიკა კვარაცხელიას განზრახ მკვლელობის საქმეზე ბრალდებულ აკო ჭელიძისა და გიორგი კავილაძის მიმართ თბილისის საქალაქო სასამართლომ გამამტყუნებელი განაჩენი გამოიტანა.

მოსამართლე დავით მგელიაშვილის გადაწყვეტილებით, აკო ჭელიძეს 17 წლით, გიორგი კავილაძეს 16 წლით თავისუფლების აღკვეთა მიესაჯათ.

მოსამართლემ ბრალდებულები დამნაშავედ ცნო ჯგუფურ მკვლელობასა და ჯგუფურად იარაღის ტარების მუხლით.

განაჩენის გამოცხადებისას, თავად ბრალდებულები სხდომათა დარბაზში არ იმყოფებოდნენ. ისინი პროცესს ონლაინ ფორმატში ჩაერთნენ.

ონლაინ-პლატფორმა Feedc-ის დამფუძნებელი, 22 წლის ნიკო კვარაცხელია, 2021 წლის 15 სექტემბერს, თბილისში, ფიქრის გორაზე სასიკვდილოდ დაჭრეს. ის საავადმყოფოში მიყვანიდან მალევე გარდაიცვალა.