ევროკომისიამ რუსეთის წინააღმდეგ სანქციების მეექვსე პაკეტი წარადგინა

ევროკომისიის პრეზიდენტმა ურსულა ფონ დერ ლაიენმა რუსეთის წინააღმდეგ სანქციების მე-6 პაკეტთან დაკავშირებით წინადადებები წარადგინა.

სანქციების მორიგი პაკეტის ფარგლებში, ევროკავშირი გეგმავს რუსული ნავთობის იმპორტზე აკრძალვის დაწესებას.

ამასთან, სანქციები ითვალისწინებს "სბერბანკისა" და კიდევ ორი რუსული მსხვილი ბანკის საერთაშორისო საფინანსო სისტეა SWIFT-იდან გათიშვას.

გარდა ამისა, ევროკავშირის ტერიტორიაზე სამი ძირითადი რუსული ტელეარხის მაუწყებლობა აიკრძალება. ფონ დერ ლაიენს არ დაუკონკრეტებია, თუ რომელ ტელეარხებს შეეხებ აკრძალვა.

ევროკომისიის პრეზიდენტმა პერსონალური სანქციების შესახებაც განაცხადა. პერსონალური სანქციების ქვეშ მოექცევიან მაღალი თანამდებობის პირები, რომელთაც წვლილი მიუძღვით ბუჩაში მშვიდობიანი მოსახლეობის ხოცვა-ჟლეტაში.

ამასთან, სააგენტო "ფრანს პრესის" ინფორმაციით, ევროკავშირი გეგმავს პერსონალური სანქციების დაწესებას რუსეთის მართლმადიდებლური ეკლესიის მეთაურის, პატრიარქ კირილის წინააღმდეგ.

სანქციების ძალაში შესვლისთვის უნდა დამტკიცდეს ევროკავშირის 27-ვე ქვეყნის ელჩებისა და ევროკავშირის საბჭოს მიერ.