მტერმა განაახლა შეტევა „აზოვსტალის“ ტერიტორიაზე კონტროლის დამყარების მიზნით. წარმატებები არ აქვთ - უკრაინის გენშტაბი

მარიუპოლში, „აზოვსტალის“ რაიონში რუსეთის ძალები ცდილობენ გაანადგურონ უკრაინული დანაყოფები. ამის შესახებ ნათქვამია უკრაინის შეიარაღებული ძალების გენშტაბის ინფორმაციაში.

„მარიუპოლში, „აზოვსტალის“ რაიონში გრძელდება ბლოკირება და ჩვენი ქვედანაყოფების განადგურების მცდელობა. ცალკეულ რაიონებში ავიაციის დახმარებით, მტერმა განაახლა შეტევა ქარხნის ტერიტორიაზე კონტროლის დამყარების მიზნით. წარმატებები არ აქვთ“, - აღნიშნულია ინფორმაციაში.

ამის გარდა მოწინააღმდგე აგრძელებს შეტევით ოპერაციას აღმოსავლეთით.

„რუსეთის არმიის სარდლობა ცდილობს გაზარდოს უკრაინის აღმოსავლეთით შეტევის ტემპები ლუჰანსკისა და დონეცკის ოლქების ადმინისტრაციულ საზღვრებზე გასვლის მიზნით, ასევე ცდილობს განავითაროს შეტევა ზაპოროჟიესა და კრივოი როგის მიმართულებით“, - აღნიშნულია გენშტაბის ინფორმაციაში.

ამასთან, გენშტაბის თანახმად, რუსმა ოკუპანტებმა უკრაინის მოსაზღვრე ბელგოროდის ოლქის ტერიტორიაზე განალაგეს 40 ერთეული შეტევითი და სატრანსპორტო ვერტმფრენი მი-24 და მი-8.

შეგახსნებთ, დღეს გავრცელდა ინფორმაცია „აზოვსტალის“ ქარხანაში რუსეთის ძალების შეჭრის შესახებ. მოგვიანებით ინფორმაცია „რადიო თავისუფლებას“ დაუდასტურა „ვერხოვნა რადას“ ფრაქცია „სლუგა ნაროდუს“ თავმჯდომარემ დავით არახამიამ. მისივე ინფორმაციით, აღდგენილია კავშირი უკრაინელ დამცველებთან. „აზოვსტალის“ ტერიტორიაზე მძიმე ბრძოლები მიმდინარეობს.