„აზოვის“ პოლკი „აზოვსტალის“ ქარხნის ტერიტორიიდან ოკუპანტების განდევნის ცნობას არ ადასტურებს

„აზოვის“ პოლკის მეთაურის მოადგილე კაპიტანი სვიატოსლავ პალამარი უარყოფს ინფორმაციას „აზოვსტალის“ ტერიტორიიდან რუსი ოკუპანტების განდევნის შესახებ. პალამარი 24tv.ua-ს ესაუბრა. მანამდე გავრცელდა ინფორმაცია, რომ უკრაინელმა დამცველებმა ოკუპანტები ქარხნიდან განდევნეს.

რუსი ოკუპანტები უკვე მესამე დღეა, რაც მარიუპოლის „აზოვსტალის“ ქარხნის ტერიტორიაზე შეიჭრნენ. ისინი განდევნილი არ არიან, და ამ დრომდე შტურმს აგრძელებენ. ტერიტორიაზე სისხლისმღვრელი ბრძოლები მიმდინარეობს.

„კიდევ ერთხელ ვიმეორებ: არავის არავინ განუდევნია, ისინი {რუსები} ქარხნის ტერიტორიაზე არიან. მიმდინარეობს მძიმე ბრძოლები“, - განაცხადა პალამარმა.

გარდა ამისა, ერთ-ერთი აზოველის თქმით, დამპყრობლებმა ქარხნის ტერიტორიის ნაწილი დაიკავეს. ცეცხლის შეწყვეტის რეჟიმი არ ყოფილა. ქარხნის ტერიტორიაზე ამ დრომდე რჩებიან სამოქალაქო პირები, ქალები, ბავშვები და მძიმედ დაჭრილები.

მანამდე უკრაინის პრეზიდენტის ოფისის მრჩეველმა ოლექსეი არესტოვიჩმა განაცხადა, რომ რუსეთის ჯარები 4 მაისს „აზოვსტალის“ ტერიტორიაზე შეიჭრნენ, მაგრამ ისინი უკრაინელმა დამცველებმა განდევნეს, თუმცა იქვე დაამატა, რომ ხელისუფლება აღნიშულ ინფორმაციას აზუსტებდა.