„აზოვსტალიდან“ ექიმებისა და დაჭრილების გამოყვანა იგეგმება - ზელენსკი

უკრაინის პრეზიდენტმა ვოლოდმირ ზელენსკიმ  განაცხადა, რომ ხელისუფლება საერთაშორისო ორგანიზაციებთან ერთად „აზოვსტალის“ ქარხნის ტერიტორიიდან დაჭრილი სამხედროებისა და ექიმების ევაკუაცია გეგმავს.

ამის შესახებ ზელენსკიმ ვიდეომიმართვაში განაცხადა.

„მადლობას ვუხდი წითელი ჯვრის საერთაშორისო კომიტეტსა და გაეროს, რომლებიც დაგვეხმარნენ „აზოვსტალიდან“ ევაკუაციის პირველი ეტაპის განხორცილებაში. შესაძლებელი გახდა 300-ზე მეტი ადამიანის - ქალების, ბავშვების გადარჩენა. „აზოვსტალიდან“ ფაქტობრივად, გამოვიყვანეთ სამოქალაქო პირები.  

და ვემზადებით ევაკუაციის მეორე ეტაპისთვის - დაჭრილებისა და ექიმების გამოყვანისთვის. რა თქმა უნდა, თუ ყევლა შეასრულებს შეთანხმებას. რა თქმა უნდა, თუ არ იქნება ტყუილი. ცხადია, ვმუშაობთ იმაზეც, რომ გამოვიყვანოთ ჩვენი სამხედროებიც, მარიუპოლის ყველა გმირი დამცველი. ეს ძალიან რთულია, მაგრამ მნიშვნელოვანი.

დარწმუნებული ვარ, ყველას ესმის ამ სირთულის მთავარი მიზეზი, ასევე ის, თუ სად არის ეს მიზეზი, მაგრამ ჩვენ იმედს არ ვკარგავთ, ჩვენ არ გავჩერდებით“, - განაცხადა ზელენსკიმ.

ზელენსკიმ აღნიშნა, რომ ამჟამად განიხილება „აზოვსტალის“ მიწისქვეშა ბომბსაფარებიდან უკრაინელი სამხედროების გამოყვანის დიპლომატიური გზა. რუსეთის საოკუპაციო ძალების შტურმი „აზოვსტალის“ ქარხნის წინააღმდეგ რამდენიმე დღეა გრძელდება.