„აზოვსტალიდან“ ექიმებისა და დაჭრილების ევაკუაციაზე მოლაპარაკებები გრძელდება - უკრაინული მედია

გრძელდება მოლაპარაკებები „აზოვსტალის“ ქარხნიდან მედიკოსებისა და დაჭრილების, ასევე მარიუპოლის სხვა რაიონებიდან მოსახლეობის გამოყვანის შესახებ.

„უნიანის“ ინფორმაციით, ამის თაობაზე ბრიფინგზე ჰუმანიტარული კორიდორების მოქმედების კოორდინატორმა ტატიანა ლომაკინამ განაცხადა.

 „მიმდინარეობს მოლაპარაკებები სამედიცინო პერსონალისა და დაჭრილების გადასარჩენად ჰუმანიტარული ოპერაციის მეორე ეტაპთან დაკავშირებით, მათი რაოდენობა 500-მდეა. ასევე მოლაპარაკებები მიმდინარეობს ჰუმანიტარული დერეფნების გახსნაზე, რომელსაც თავად მარიუპოლელები საჭიროებენ“, - განაცხადა მან.

ლომაკინას თქმით, ქალაქში ჯერ კიდევ იმყოფება რამდენიმე ათასი ადამიანი, ძორითადად მოხუცები, ქალები და ბავშვები.

„ისინი ელიან შველას და უკრაინა ყელაფერს გააკეთებს, რომ გაიხსნას ჰუმანიტარული დერეფნები და დავეხმაროთ ადამიანებს გადავიდნენ უკრაინის მშვიდობიან ტერიტორიებზე“, - განაცხადა ლომაკინამ.

11 მაისს უკრაინის ვიცე-პრემიერმა ირინა ვერეშჩუკმა განაცხადა, რომ „აზოვსტალის“ ტერიტორიაზე შესაძლოა იმყოფებოდეს ათასამდე მებრძოლი, მათი ნახევარი მძიმედ არის დაჭრილი. მისი თქმით, კიევმა რუსეთს დაჭრილი მებრძოლების რუს ტყვეებზე გაცვლის წინადადებით მიმართა. თუმცა ვიცე-პრემიერის თქმით, შეთანხმება ჯერ მიღწეული არ არის და მოლაპარაკებები გრძელდება.