პუტინის ქალიშვილის პარტნიორი გვარად ზელენსკია და მას ქართული განათლება აქვს

ჟურნალისტებმა რუსეთის პრეზიდენტ ვლადიმირ პუტინის ქალიშვილის ეკატერინა ტიხონოვას ახალი პარტნიორის მონაცემებს მიაგნეს. ის მიუნხენის (ბავარიის) სახელმწიფო ბალეტის მხატვრული ხელმძღვანელი იგორ ზელენსკი აღმოჩნდა.

ამის შესახებ რუსული მედია მოპოვებულ მასალებსა და ბავარიის ბალეტის თეატრის წყაროზე დაყრდნობით ავრცელებს.

გავრცელებული ინფორმაციით, ბოლო წლებში ტიხონოვა თავის პარტნიორთან ერთად რუსეთსა და გერმანიაში ცხოვრობდა.  ერთ-ერთი დოკუმენტი, რომელსაც გამოცემა „ვაჟნიე ისტორიი“ ეყრდნობა, მიუნხენი-მოსკოვის ჩარტერული რეისის მგზავრების სიაა, რომელიც 2019 წლის 9 დეკემბერს შესრულდა.

როგორც პუბლიკაციიდან ირკვევა, ამ რეისით დაფრინავდნენ ეკატერინა ტიხონოვა, იგორ ზელენსკი, მათი ორი წლის ქალიშვილი, ასევ ორი ძიძა, ფორტეპიანოს მასწავლებელი და რუსეთის პრეზიდენტის უსაფრთხოების სამსახურის სამი თანამშრომელი.

ჟურნალისტებმა ასევე მოიპოვეს მონაცემები რუსეთის პრეზიდენტის უსაფრთხოების სამსახურის თანამშრომლის ელექტრონული ფოსტიდან, რომელიც ეკატერინა ტიხონოვას პირადი მცველია. ამ დოკუმენტებს შორის არის ტიხონოვას, ზელენსკისა და მათი ქალიშვილის პასპორტები.

ამის გარდა, წყარომ მიუნხენის ბალეტის თეატრიდან, გამოცემა Der Spiegel-ს უთხრა, რომ იგორ ზელენსკი დიდი ალბათობით პუტინის ქალიშვილის პარტნიორია.

იგორ ზელენსკი 1969 წელს კრასნოდარში დაიბადა, სწავლობდა თბილისის ქორეოგრაფიულ სასწავლებელში, ვახტანგ ჭაბუკიანის კლასში. ხშირად გამოდიოდა თბილისის საბალეტო დასთან ერთად სპექტაკლებზე თბილისში. კარგად საუბრობს ქართულად.

გავრცელებული ინფორმაციით, მას შემდეგ, რაც რუსეთი უკრაინაში შეიჭრა, იგორ ზელენსკიმ ბავარიის თეატრში მუშაობა შეწყვიტა. ზელენსკის თეატრიდან წასვლის მიზეზი ის გახდა, რომ მან უარი თქვა ომის წინააღმდეგ საჯაროდ გამოსვლაზე.

იგორ ზელენსკი თბილისში, ჯორჯ ბალანჩინის ბალეტში „აპოლონ მუსაგეტი“.