გერმანიის ყოფილ კანცლერ გერჰარდ შროდერს რუსეთთან კავშირის გამო პრივილეგიები ჩამოართვეს

ბუნდესტაგმა გერმანიის ყოფილ კანცლერ გერჰარდ შროდერს პრივილეგიების ნაწილი ჩამოართვა, რომლითაც როგორც წესი, ქვეყნის ლიდერები სარგებლობენ. წერს Bild.

კერძოდ, შროდერს აღარ ექნება ოფისი პარლამენტში და აღარ ეყოლება თანამშრომლები, რომლებსაც ანაზღაურება ბიუჯეტიდან ერიცხებათ.

როგორც Bild-ი აღნიშნავს, შესაბამისი გადაწყვეტილების ფორმალურ მიზეზად სახელდება ის, რომ ყოფილი კანცლერი არ იყენებს მისთვის ხელმისაწვდომ ფართს და თანამშრომელთა განაკვეთებს. ამასთან, გამოცემა წერს, რომ ბუნდესტაგის დეპუტატები უკმაყოფილონი არიან რუსეთთან შროდერის მჭიდრო ურთიერთობებით, ასევე მას ადანაშაულებენ საერთაშორისო ასპარეზზე გერმანიისთვის რეპუტაციული ზიანის მიყენებაში.

პენსიის უფლება შროდერისთის ჯერ არ ჩამოურთმევიათ, თუმცა მისი თანამოაზრეები სოციალ-დემოკრატიული პარტიიდან ამ ვარიანტისკენენაც იხრებიან. ამასთან, ყოფილი კანცლერი კვლავ უზრუნველყოფილი იქნება დაცვის მომსახურებით.

შროდერისთვის ზოგიერთი პრივილეგიის ჩამორთმევის პარალელურად ევროპარლამენტმა მხარი დაუჭირა ყოფილი კანცლერის სანქცირებულთა სიაში შეყვანას. როგორც Bild-ი წერს, სანქციებს ევროპარლამენტი არ აკისრებს, მაგრამ შესაბამისმა რეზოლუციამ, შესაძლოა, გავლენა  მოახდინოს სანქციების სიის ფორმირებაზე.

გერჰარდ შროდერი გერმანიის კანცლერის პოსტს 1998-2005 წლებში იკავებდა. 2006 წლიდან ის ხელმძღვანელობდა გაზსადენ „ჩრდილოეთ ნაკადი 2“-ის ოპერატორ Nord Stream AG-ის აქციონერთა კომიტეტს.

2007 წლიდან შროდერი ხელმძღვანელობს „როსნეფტის“ დირექტორთა საბჭოს. თებერვალში ის „გაზპრომის“ დირექტორთა საბჭოში აირჩიეს. ყოფილ კანცლერს მკაცრად აკრიტიკებდნენ იმის გამო, რომ მან „როსნეფტი“ უკრაინაში რუსეთის სასტიკი შეჭრის შემდეგ დაუყოვნებლივ  არ დატოვა.