ოდესაში რუსული დესანტის გადასხმის საფრთხე არ არის - პენტაგონი

პენტაგონში აცხადებენ, რომ ოდესას უახლოეს ხანებში რუსეთის დესანტის გადასახმა არ ემუქრება.

ამის შესახებ პენტაგონის ერთ-ერთმა მაღალჩინოსანმა გამოცემა Foreign Affairs-ს განუცხადა.  

„სამხრეთ უკრაინაში რუსები უკრაინის პოზიციებს საარტილერიო დარტყმებს აყენებენ და მიკოლაივის მიმართულებით შტურმის განხორციელებას ცდილობენ. {რაც შეეხება} ოდესას, რუსული დესანტის გადასხმის საფრთხე არ არის“, - განაცხადა მან.

პენტაგონის დაზვერვის მონაცემებით, რუსულმა ავიაციამ  დღე-ღამეში თვითმფრინავების საბრძოლო გაფრენა 140-მდე შეამცირა, რაც 100-150 გაფრენით ნაკლებია გასულ კვირებთან შედარებით.

დონბასში რუსეთის სარდლობა ცდილობს შტურმი მიიტანოს უკრაინის შეიარაღებული ძალების პოზიციებზე მცირე ქვედანაყოფებით მას შემდეგ, რაც დიდმა შენაერთებმა წარმატებებს ვერ მიაღწიეს.

პენტაგონის წარმომადგენელმა ასევე აღნიშნა, რომ რუსები, სავარაუდოდ, ამ ფორმით ცდილობენ გააუმჯობესონ ჯარის ლოჯისტიკა, რადგან მცირე დანაყოფები ნაკლებ ლოჯისტიკურ ძალისხმევას მოითხოვს.

ამჟამად, პენტაგონი აფიქსირებს რუსების გარღვევის მცდელობას იზიუმის მხრიდან სლავიანსკის მიმართულებით, მაგრამ რუსეთის იერიში წარუმატებელია.

საერთო ჯამში პენტაგონი მიიჩნევს, რომ რაოდენობრივი უპირატესობა დღემდე რუსეთის საოკუაპციო ძალების მხარესაა, თუმცა უკრაინელი დამცველები მაინც დიდ წინააღმდეგობას უწევენ. რაც შეეხება საბრძოლო ძალას, რუსები აქაც აჭარბებენ უკრაინის ძალას.

19 მაისის მდგომარეობით, უკრაინის ტერიტორიაზე განთავსებულია 106 ბატალიონის ტაქტიკური ჯგუფი, ზოგიერთი დანაყოფი ჩრდილოეთ უკრაინიდან რეზერვების შევსებისთვის დასვენების გარეშე გადაისროლეს. ამერიკის დაზვერვას არ აქვს მონაცემები, რომელიც დაადასტურებს რუსეთში მასობრივი მობილიზაციის სამზადისს.

პენტაგონის წარმომადგენლის აზრით, ომი, შესაძლოა, დიდხანს გაგრძელდეს, როგორც ეს 2014-2015 წლებში დონბასში საბრძოლოს შეტაკებების მწვავე ფაზის შემდეგ მოხდა.