თურქეთმა დააკავა რუსული გემი, რომელსაც უკრაინიდან მოპარული ხორბალი გადაჰქონდა

თურქეთის საბაჟო სამსახურმა რუსული გემი დააკავა, რომელსაც ოკუპირებული ბერდიანსკის პორტიდან მოპარული უკრაინული ხორბალი გადაჰქონდა.

ამის შესახებ თურქეთში უკრაინის ელჩმა ვასილი ბოდნარმა უკრაინულ მედიას განუცხადა.

„გემი ახლა პორტის შესასვლელთან დგას. ის თურქეთის საბაჟო სამსახურმა დააკავა. ხვალ გაიმართება უწყებათაშორისი სხდომა, რომელზეც ამ გემის ბედი გადაწყდება“, - განაცხადა ბოდნარმა.

ელჩმა აღნიშნა, რომ თურქული მხარისთვის უკრაინის გენერალური პროკურატურის მოთხოვნა გადაცემულია და უკრაინა იმედოვნებს, რომ ხომალდს დააპატიმრებენ, მოხდება ქონების კონფისკაცია და მასთან დაკავშირებული ყველა პირი პასუხისგებაში მიეცემა.

„ამ გემთან დაკავშირებით სიტუაცია განსაკუთრებულია,  რადგან ის იყო პირველი, ვინც სცადა დროებით დაკავებული პორტის გამოყენება და თურქეთის პორტში შესვლა. ეს არალეგალურია და დიდი თავხედობაა იმის მცდელობა, რომ გაჭრა დერეფანი, რათა ისარგებლო შემთხვევით და გაიტანო ქონება“, - თქვა ბოდნარმა.

1-ელ ივლისს, თურქეთის პორტში ოკუპირებული ბერდიანსკიდან შევიდა რუსული გემი Zhibek Zholy. მანამდე ოკუპანტების მიერ დანიშნულმა ზაპოროჟიეს ე.წ. დროებითი ადმინისტრაციის ხელმძღვანელმა განაცხადა ,რომ ხომალდმა ბერდიანსკიდან 7 ათასი ტონა უკრაინული ხორბალი გაიტანა.