ლიეტუვამ კალინინგრადთან სარკინიგზო ტრანზიტი განაახლა

ლიეტუვის რკინიგზამ (LTG Cargo) კალინინგრადის მიმართულებით სანქცირებული ტვირთების სარკინიგზო ტრანზიტი განაახლა. ამის შესახებ "დოიჩე ველეს" ცნობით, LTG Cargo-ს წარმომადგენელმა მანტას დუბაუსკასმა განაცხადა.

დუბაუსკასის განცხადებით, სარკინიგზო ტრანზიტის განახლება შესაძლებელი გახადა ევროკომისიის მიერ გამოცემულმა განმარტებამ, რომლის თანახმადაც, "სანქცირებული ტვირთის ტრანზიტი სარკინიგზო ტრანსპორტით დაშვებულია, ხოლო საავტომობილო ტრანსპორტით კვლავ აკრძალულია".

კალინინგრადის ოლქის ხელისუფლების წარმომადგენელმა დიმიტრი ლისკოვმა თავის მხრივ განაცხადა, რომ უახლოეს მომავალში კალინინგრადის ოლქში 60 ვაგონი ცემენტი გაიგზავნება.

შეგახსენებთ, 17 ივნისს, ევროკავშირის სანქციების ფარგლებში, ლიეტუვამ შეზღუდა ფოლადისა და შავი ლითონების ტრანზიტი კალინინგრადის ოლქის მიმართულებით. 10 ივლისიდან ამ ჩამონათვალს ცემენტის, ალკოჰოლის და სხვა საქონლის იმპორტის აკრძალვა დაემატა. ტრანზიტის აკრძალვას მკაცრი რეაქცია მოჰყვა კრემლში, რომელიც "საპასუხო ნაბიჯების" გადადგმით დაიმუქრა.

13 ივლისს, ევროკომისიამ განმარტა, რომ გარკვეული პირობების გათვალისწინებით, ის არ კრძალავს რუსული საქონლის ტრანზიტს სარკინიგზო გზით, კალინინგრადის მიმართულებით.

კალინინგრადი არის რუსეთის ექსკლავი, რომელიც ესაზღვრება ლიეტუვასა და პოლონეთს.