ხარკოვზე რუსეთის სარაკეტო იერიშს მსხვერპლი მოჰყვა

საქართველო, თბილისი - 15:28 | 18.08.2022

ნანახია: 427

17 აგვიტოს ღამით და 18 აგვისტოს გამთენიისას, რუსეთის საოკუპაციო ძალებმა ხარკოვის ოლქზე იერიში მიიტანეს.

ოლქის ადმინისტრაციის ხელმძღვანელის ოლეგ სინეჰუბოვი ინფორმაციით, სარაკეტო თავდასხმებს მშვიდობიანი მოსახლეობა ემსხვერპლა, არიან დაჭრილები.

"გასული ღამე იყო ერთ-ერთი ყველაზე ტრაგიკული ხარკოვის ოლქისთვის, მთელი ომის განმავლობაში. ღამით რუსებმა განახორციელეს მასიური სარაკეტო თავდასხმები ხარკოვზე", - წერს სინეჰუბოვი ტელეგრამის არხზე.

მისივე თქმით, 17 აგვისტოს, დაახლოებით 21:30 საათზე, რუსული რაკეტა (სავარაუდოდ "ისკანდერი") სალტოვსკის რაიონში სამსართულიან საცხოვრებელ კორპუსს მოხვდა. სახლი თითქმის მთლიანად განადგურდა, იყო მასშტაბური ხანძარი. ბოლო მონაცემებით, ნანგრევების ქვეშ დაიღუპა 7 ადამიანი, დაშავდა 17, მათ შორის 11 წლის ბავშვი.

"სლობოდსკის რაიონში ერთ-ერთი რაკეტა ოთხსართულიანი საერთო საცხოვრებლის შენობას მოხვდა, შენობა ნაწილობრივ დაინგრა, ამ დროისთვის 2 ადამიანი დაიღუპა, 18 (მათ შორის 2 ბავშვი) დაშავდა.

გარდა ამისა, დღეს დაახლოებით დილის 4 საათზე კრასნოგრადზე სარაკეტო შეტევა განხორციელდა. შედეგად დაინგრა საცხოვრებელი კორპუსები, დაზიანდა 10-ზე მეტი სახლი. დაიღუპა 2 მშვიდობიანი მოქალაქე, 2 (მათ შორის 12 წლის ბავშვი) დაშავდა", - განაცხადა სინეჰუბოვმა.

დაბომბვის ადგილებზე მუშაობენ სასწრაფო-სამედიცინო დახმარების ბრიგადები.

ხარკოვზე განხორციელებულ ბოლო თავდასხმას პრეზიდენტმა ვოლოდიმირ ზელენსკიმ "საზიზღარი და ცინიკური" უწოდა.