ნამდვილად არ გვჭირდება დახმარება იმაში, რომ ქვეყანაში ატყდეს ომი, იყოს დესტაბილიზაცია და იღუპებოდნენ ადამიანები - თეა წულუკიანი დავით არახამიას

საქართველოს კულტურის მინისტრი თეა წულუკიანი უკრაინის რადის ფრაქცია „ხალხის მსახურის“ თავმჯდომარის დავით არახამიას ვიდეომიმართვას ეხმიანება. ის ამბობს, რომ საქართველოს არ სჭირდება არახამიას დახმარება.

„ბატონი არახამია ჩვენთან უკვე არის, როგორც ვამბობთ, პროგრამაში, იმიტომ, რომ დღე ერთია და რამდენიმე განცხადებას აკეთებს საქართველოსა და მის შიდა პოლიტიკურ საქმეებზე, რისი უფლებაც მე არ მგონია, რომ მას ასე პირდაპირ ჰქონდეს, როგორც უცხო ქვეყნის მოქალაქეს, მიუხედავად მისი გვარ-სახელისა, - აღნიშნა წულუკიანმა და განაგრძო, - უბრალოდ ვუპასუხებდი, რომ ჩვენ ნამდვილად არ გვჭირდება დახმარება იმაში, რომ ქვეყანაში ატყდეს ომი; ჩვენ ნამდვილად არ გვჭირდება დახმარება იმაში, რომ ამ ქვეყანაში იყოს დესტაბილიზაცია და იღუპებოდნენ ადამიანები; პირიქით, სულ სხვა სტილით ვმართავთ ქვეყანას. ჩვენ ყველაფერს ვაკეთებთ, ხანდახან მთავრობა და პარლამენტი აკეთებს შეუძლებელსაც კი, იმისთვის, რომ ქვეყანაში იყოს მშვიდობა, ბავშვები დილით კარგ ხასიათზე მიდიოდნენ ბაღებსა და სკოლებში, ხოლო, ზაფხულში ისვენებდნენ მშვიდობიან გარემოში და მათი მშობლები არ ნერვიულობდნენ იმაზე, რომ შეიძლება, მათ სიცოცხლეს საფრთხე შეექმნას. ეს არის, რაც არის ჩვენი კრედო, მინდა ვუთხრა, ბატონ არახამიას. ამიტომ, მისი დახმარება ჩვენ არ გვჭირდება, იმიტომ, რომ ჩვენ ვიბრძვით მშვიდობისთვის, - თქვა წულუკიანმა".

არახამიამ 7 სექტემბერს განაცხადა, რომ თუ ქართველებს დამოუკიდებლად ვერ განახორციელონ დეოლიგარქიზაცია, ამაში მათ უკრაინა დაეხმარება.