"არ შემიძლია მოვკლა" – კრასნოდარში 27 წლის რეპერმა მობილიზაციის გამო თავი მოიკლა

კრასნოდარში, რუსეთის ფედერაციაში გამოცხადებული ნაწილობრივი მობილიზაციის გამო, რეპერმა ივან პეტუნინმა, ცნობილმა როგორც Walkie, თავი მოიკლა.

გამოცემა meduza-ს ინფორმაციით, 27 წლის პეტუნინის ცხედარი ქალაქის ერთ-ერთ მაღალსართულიან კორპუსთან იპოვეს. გარდაცვალებამდე ცოტა ხნით ადრე მან გამოაქვეყნა ვიდეო, რომელშიც აცხადებდა, რომ ომში წასვლის სურვილი არ ჰქონდა და ამის გამო თვითმკვლელობას აპირებდა.

"თუ ამ ვიდეოს უყურებთ, მე ცოცხალი აღარ ვარ... არ შემიძლია და არ მინდა მკვლელობის ცოდვა ჩემს სულზე ავიტანო. მე არ ვარ მზად რამე იდეალისთვის მოკვლა," - ამბობდა რეპერი ვიდეოში.

ვიდეოს ბოლოს მან აღნიშნა, რომ რუსეთი ერთ-ერთი მანიაკის ტყვეობაში იმყოფება.

პეტუნინის თქმით, ფსიქონევროლოგიურ დისპანსერში ყოფნის გამო მას მობილიზაცია არ ეხებოდა, თუმცა შიშობდა, რომ „უახლოეს დღეებში ნაწილობრივი მობილიზაცია სრულ მობილიზაციაში გადაიქცეოდაა“.