უკრაინის წინააღმდეგ რუსეთის მასირებული იერიშის შედეგად მსხვერპლთა რაოდენობა 19-მდე გაიზარდა

უკრაინის წინააღმდეგ 10 ოქტომბერს რუსეთის მიერ განხორციელებული, მასირებული სარაკეტო იერიშის შედეგად მსხვერპლღა რაოდენობა 19-მდე გაიზარდა, დაშავებულია კიდევ 105 ადამიანი.

გუშინ, ვრცელდებოდა ინფორმაცია 14 დაღუპულისა და 97 დაშავებულის შესახებ.

ინფორმაციას უკრაინის საგანგებო სიტუაციების სამსახური ავრცელებს.

12 ოლქისა და კიევის დაბომბვის შედეგად ხანძრის 30 კერა გაჩნდა, რომელიც უკვე ლიკვიდირებულია.

ელექტროენერგიის გარეშეა დარჩენილი კიევის, ლვოვის, სუმის, ტერნოპოლისა და ხმელნიცკის ოლქების 301 დასახლებული პუნქტი.

შეგახსენებთ, 10 ოქტომბერს, დილით რუსეთის საოკუპაციო ძალებმა უკრაინის ტერიტორიის წინააღმდეგ 84 რაკეტა ისროლეს. სარაკეტო დარტყმები დაფიქსირდა ვინიცის, ლვოვის, კიროვოგრადის, მიკოლაივის, პოლტავის, ტერნოპოლის, ჟიტომირისა და კიევის ოლქებში.

მოგვიანებით, რუსეთის პრეზიდენტმა ვლადიმირ პუტინმა განაცხადა, რომ რუსეთმა იერიში მიიტანა უკრაინის ქალაქებსა და კრიტიკული ინფრასტრუქტურის ობიექტებზე და უკრაინას ახალი სარაკეტო დარტყმებით დაემუქრა.

უკრაინის დაზვერვის ინფორმაციით, რუსეთის ხელისუფლება მასირებულ შეტევას ჯერ კიდევ ოქტომბრის დასაწყისიდან გეგმავდა.

აშშ-ის პრეზიდენტმა ჯო ბაიდენმა განაცხადა, რომ პუტინის სარაკეტო ტერორი ვერ შეარყევს აშშ-ს მხარდაჭერას უკრაინის მიმართ. მანვე ზელენსკისთან სატელეფონო საუბრისას აღნიშნა, რომ შეერთებული შტატები უკრაინას მოწინავე საჰაერო თავდაცვის სისტეებს გადასცემს.