შეფასების წერა 2023-ის ბოლოს დასრულდება, სავარაუდოდ, იქნება ნეგატიური - ჯაფარიძე ევროკავშირის წევრობის კანდიდატის სტატუსზე

შეფასების წერას დაიწყებენ თებერვალ-მარტში, მაღალი ალბათობით იქნება ნეგატიური, - ამის შესახებ  გირჩი-მეტი თავისუფლების ლიდერმა, ზურაბ ჯაფარიძემ ბრიუსელში გამართულ შეხვედრებთან დაკავშირებით განაცხადა. მისი თქმით, კანდიდატის სტატუსზე ევროკავშირი შეფასების წერას არა მიმდინარე წლის ბოლოს, არამედ მომავალი წლის თებერვალ-მარტში დაიწყებს და 2023 წლის ბოლოს დაასრულებს.

"ხაზი მინდა გავუსვა, რომ წლის ბოლოს სავარაუდოდ, არანაირი შეფასების მისია საქართველოში არ იქნება. შეფასების წერას დაიწყებენ მომავალი წლის თებერვალ-მარტში და დაასრულებენ წლის ბოლოს და მაღალი ალბათობით ამ წუთის მდგომარეობით, ისეთ ტენდენციებს ხედავენ ისინი, რომ შეფასება იქნება ნეგატიური. მათ შორის ამის მიზეზი არის ის, რომ რიგ პუნქტებთან მიმართებაში ისინი ელოდებიან არა საკანონმდებლო ცვლილებებს, არამედ დააკვირდნენ როგორ მუშაობს ეს საკანონმდებლო ცვლილებები, უნდა დაინახონ რეალურ ცხოვრებაში რომ ამ საკანონმდებლო ცვლილებებს მოაქვს შედეგი.

მათ შორის, ერთ-ერთი პუნქტია დეოლიგარქიზაცია, დეოლიგარქიზაციაზე უბრალოდ კანონის მიღება არაა საკმარისი, საჭიროა დროში დაკვირვება, რომ ნახონ მოხდა თუ არა დეოლიგარქიზაცია და როგორც გვითხრეს, ამისთვის პრაქტიკაში დაკვირვებისთვის რჩება სულ უფრო და უფრო ნაკლები დრო, რადგან ბევრ პუნქტებთან მიმართებაში ოცნებას ნაბიჯი არ გადაუდგამს", - თქვა ჯაფარიძემ.