ბოლო 24 საათში უკრაინამ კონტროლი 12 დასახლებაზე აღადგინა - ზალუჟნი

უკრაინის შეიარაღებული ძალების მთავარსარდალი ვალერი ზალუჟნი აცხადებს, რონ ბოლო 24 საათის განმავლობაში უკრაინამ 12 დასახლებულ პუნქტზე აღადგინა კონტროლი.

„უშუალოდ ხერსონის მიმართულებაზე უკრაინის თავდაცვის ძალებმა გაანადგურეს ლოჯისტიკური გზა და უზრუნველყოფის სისტემა, დაარღვიეს მოწინააღმდეგის სამეთაურო-მართვის სისტემა. ამით მტერს გაქცევის გარდა სხვა გამოსავალი არ დაუტოვეს“, - თქვა ზალუჟნიმ.

ამასთან, ზალუჟნიმ განაცხადა, რომ ამჟამად ვერ დაადასტურებს და ვერც უარყოფს ინფორმაციას ხერსონიდან რუსული ჯარის გასვლის შესახებ. მისი თქმით, უკრაინის შეიარაღებული ძალები განაგრძობენ შეტევას გეგმის მიხედვით.

მისივე თქმით, 1-ლი ოქტომბრის შემდეგ მტრის პოზიციების სიღრმეში უკრაინის ძალებმა 36,5 კმ-ით წინ წაიწიეს. დაბრუნებული ტერიტორიების საერთო ფართობი 1 381 კვადრატულ კილომეტრს შეადგენს, აღდგენილია კონტროლი 41 დასახლებულ პუნქტზე.

უკრაინის ხელისუფლება ჯერჯერობით თავშეკავებულად რეაგირებს რუსეთის განცხადებაზე ხერსონიდან ჯარის გაყვანის შესახებ, ხელისუფლების წარმომადგენლები ამბობენ, რომ ჯერ ვერ ხედავენ ჯარის გასვლის რეალურ ნიშნებსმ მათივე განცხადებით, რუსულმა დაჯგუფებებმა მარჯვენა ნაპირზე ზღუდეები აღმართეს და თავის დასაცავად ემზადებიან.