რუსები, როგორც ჩანს, არა აპირებენ უკრაინის დანარჩენი ოკუპირებული ტერიტორიების დატოვებას - პენტაგონი

ხერსონის გათავისუფლება უკრაინისთვის მნიშვნელოვანი წარმატებაა, თუმცა რუსები არ აპირებენ დანარჩენი  ოკუპირებული ტერიტორიების დატოვებას, სადაც ბრძოლებია მოსალოდნელი.

ამის შესახებ ბრიფინგზე პენტაგონის წარმომადგენელმა განაცხადა.

„ჩვენი შეფასებით, რუსულმა ჯარმა მდინარის აღმოსავლეთ ნაპირზე გადაინაცვლა და თავდაცვითი ხაზები ააშენა“, - განაცხადა მან.

პენტაგონის წარმომადგენლის თქმით, უკრაინის ძალები განაგრძობენ მიღწეული წარმატების გამყარებას და დაკავებულები არიან რუსების მიერ დატოვებული  ნაღმების გაწმენდით. უკრაინელები ასევე აფასებენ რუსი ოკუპანტების მიყენებულ ზარალს. პენტაგონის წარმომადგენლის თქმით, არსებობს ვარაუდის საფუძველი, რომ რუსებმა მნიშვნელოვანი ზიანი მიაყენეს ხერსონის ინფრასტრუქტურას, მათ შორის წყალმომარაგებასა და სხვა კომუნალურ სისტემებს.

 „რუსები, როგორც ჩანს, არ აპირებენ უკრაინის დანარჩენი ოკუპირებული ნაწილის დატოვებას და იქ, სავარაუდოდ, მძიმე ბრძოლებია მოსალოდნელი. მაგრამ გათავისუფლებული ქალაქი ხერსონი -მნიშვნლოვანი მიღწევაა და დადასტურებაა უკრაინელი ხალხისა და მისი შეიარაღებული ძალების გამძლეობისა და სიმტკიცის თავიანთი ქვეყნისათვის ბრძოლაში“, - განაცხადა მან.  

პენტაგონში ფიქრობენ, რომ ზამთრის მოახლოებისას, უკრაიანში საბრძოლო მოქმედებების შენელებაა მოსალოდნელი. თუმცა პენტაგონის წარმომადგენლის თქმით, არ შენელდება აშშ-ის დახმარების ტემპი, ვინაიდან, ეს დახმარება დამოკიდებულია არა ამინდზე, არამედ იმაზე, რაც უკრაინელებს სჭირდებათ.