რუსეთის აგრესიის დაწყებიდან, უკრაინაში 8 311 მშვიდობიანი მოქალაქე დაიღუპა - პროკურატურა

უკრაინის გენერალური პროკურატურა აცხადებს, რომ რუსეთის აგრესიის დაწყებიდან უკრაინაში 8 300-ზე მეტი მშვიდობიანი მოქალაქე დაიღუპა.

ამ დროისათვის უკრაინაში, რუსეთის შეჭრის შემდეგ დაღუპულია სულ მცირე 8 311 მშვიდობიანი მოქალაქე, მათ შორის 437 ბავშვი. ამის გარდა, 11 ათასზე მეტი სამოქალაქო პირი დაიჭრა. ამის შესახებ ტელემარათონის დროს უკრაინის გენერალურმა პროკურორმა ანდრეი კოსტინმა განაცხადა. „მაგრამ ჩვენ გვესმის, რომ რეალური რიცხვი გაცილებით მეტია, ზოგიერთ ოკუპირებულ ტერიტორიაზე ჩვენ ჯერ კიდევ არ გვაქვს წვდომა“, - აღნიშნა მან.

კოსტინის თქმით, ბოლო ორ თვეში ხარკოვის, დონეცკისა და ხერსონის გათავისუფლებულ ტერიტორიებზე 700-ზე მეტი დაღუპულის ცხედარი იპოვეს, მათგან 90 პროცენტი სამოქალაქო პირია. „ფაქტობრივად, ხარკოვის ოლქის  ყოველ ქალაქში, ყოველ სოფელში ვპოულობთ ადგილებს, სადაც ხოცავდნენ მშვიდობიან უკრაინელებს“, - განაცხადა გენერალურმა პროკურორმა.

ასევე კოსტინის თქმით, ომის დაწყებიდან უკრაინის გენერალურმა პროკურატურამ აღნუსხა 45 ათასზე მეტი სავარაუდო ომის დანაშაული.

ომის დანაშულებში ბრალდება წარედგინა 216 რუს სამხედრო მოსამსახურეს, მათ შორის 17 სამხედრო ტყვეს, დანარჩენებს კი ბრალი დაუსწრებელად წარედგინათ. სასამართლოში ბრალდებები გაგზავნილია 60 პირის მიმართ,  მათგან 12 უკვე გასამართლებულია.

დანაშაულებს შორის, რომლებშიც რუსი სამხედროები არიან ბრალდებული, არის თავდასხმები დასახლებულ პუნქტებზე, სასტიკი მოპყრობა მშვიდობიანი მოქალქეების მიმართ, სამოქალაქო პირების განზრახ მკვლელობა და  სექსუალური ძალადობა.