აშშ-ს უკრაინისთვის არ მიუცია რუსეთის ტერიტორიაზე დარტყმების შესაძლებლობა, თუმცა მზად არის, უკრაინელებს ჰქონდეთ საჭირო აღჭურვილობა თავდაცვისთვის - ბლინკენი

აშშ აცხადებს, რომ უკრაინას არ ეხმარება შორ მანძილზე მოქმედების იარაღით, თუმცა ხელს არ უშლის საკუთარი შესაძლებლობების განვითარებაში.

სახელმწიფო მდივანმა ენტონი ბლინკენმა 6 დეკემბერს ვაშინგტონში, ავსტრალიის საგარეო საქმეთა და თავდაცვის მინისტრებთან შეხვედრის შემდეგ გამართულ ბრიფინგზე თქვა, რომ აშშ-ს უკრაინისთვის არ მიუცია რუსეთის ტერიტორიაზე დარტყმების შესაძლებლობა, თუმცა უნდა გვესმოდეს, რისი გავლა უწევთ ყოველდღე უკრაინელებს რუსეთის აგრესიის გამო.

„რუსეთიდან განხორციელებული დარტყმები იმ სამოქალაქო ინფრასტრუქტურის მწყობრიდან გამოყვანისკენ არის მიმართული, რომელიც მოსახლეობის გათბობას, ელექტროენერგიის მიწოდებას უზრუნველყოფს. ამას ჩვენ ზამთრის იარაღად გამოყენებას ვუწოდებთ. ეს არის უკრაინაში ყოველდღიური რეალობა. ჩვენ არც წაგვიხალისებია და არც შესაძლებლობა მიგვიცია უკრაინელებისთვის, რუსეთის შიგნით დარტყმები განახორციელონ, თუმცა მნიშვნელოვანია, გავაცნობიეროთ, რისი გადატანა უწევს უკრაინელებს ყოველდღე მათი ქვეყნის წინააღმდეგ რუსეთის აგრესიის პირობებში. ჩვენი მტკიცე მზადყოფნაა, ჩვენს მრავალ სხვა პარტნიორთან ერთად, უზრუნველვყოთ, რომ მათ ხელთ აქვთ საჭირო აღჭურვილობა საკუთარი თავის, საკუთარი ტერიტორიისა და საკუთარი თავისუფლების დასაცავად“, – განაცხადა ბლინკენმა.

5 დეკემბერს დილით, გავრცელდა ცნობები, რომ დრონებით დარტყმები სამ რუსულ აეროდრომზე განხორციელდა.