არგენტინა მსოფლიო ჩემპიონია

კატარში მიმდინარე მსოფლიო ჩემპიონატის ფინალში ერთმანეთს არგენტინა და საფრანგეთი დაუპირისპირდნენ.

მატჩის დაწყების პირველივე წუთებიდან არგენტინელების უპირატესობა გამოიკვეთა. 21-ე წუთზე ფრანგების კარში პენალტი დაინიშნა. თერთმეტმეტრიანი ლიონელ მესიმ შეასრულა და უმნიშვნელოვანესი გოლი გაიტანა -1:0. პირველი ტაიმის განმავლობაში ინიციატივა არგენტინელებს ჰქონდათ და მოედნის ცენტრში სრულ უპირატესობას ფლობდნენ, რაც მალევე მეორე გოლად აქციეს. ერთ-ერთი მორიგი შეტევისას, მაკალისტერმა დი მარიას საგოლე გადაცემა გაუკეთა და არგენტინელები ორბურთიანი უპირატესობით დაწინაურდნენ – 2:0.

მატჩის მეორე ნახევარში ფრანგებმა თამაშში დაბრუნება მაინც მოახერხეს. 79-ე წუთზე, ფრანგების ერთ-ერთი შეტევის დროს, ოტამენდმა თავის საჯარიმოში უხეშად ითამაშა და არგენტინელების კარში პენალტი დაინიშნა, რომელიც კილიან მბაპემ ძლიერი, ზუსტი დარტყმით გოლად აქცია -2:1. 81-ე წუთზე ფრანგებმა მორიგი სახიფათო შეტევა წამოიწყეს და კილიან მბაპემ მეორე გოლი გაიტანა – 2:2.

დამატებით დროში, 109-ე წუთზე ლიონელ მესიმ ანგარიში გაზარდა – 3:2. თუმცა, სიტუაცია კვლავ შეიცვალა. 118-ე წუთზე არგენტინის კარში პენალტი დაინიშნა, რომელიც მბაპემ შეასრულა და ჰეთ-თრიკის ავტორი გახდა – 3:3. დრამატული ფინალის ბედი თერთმეტმეტრიანების სერიამ გადაწყვიტა.

არგენტინა მსოფლიო ჩემპიონი მესამედ გახდა.