დავით უსუფაშვილი ეუთო-ს სპეციალურ წარმომადგენელს შეხვდა

პარლამენტის თავმჯდომარე დავით უსუფაშვილი სამხრეთ კავკასიის საკითხებში ეუთო-ს სპეციალურ წარმომადგენელს გიუნტერ ბეხლერს შეხვდა.
საკანონმდებლო ორგანოს პრესსამსახურის ინფორმაციით, შეხვედრაზე მხარეებმა ევროპის უსაფრთხოებისა და თანამშრომლობის ორგანიზაციის ეგიდით მიმდინარე პროცესები, საქართველოს უსაფრთხოების გაზრდის პოტენციალი და ჟენევის მოლაპარაკებების შემდგომი რაუნდის საკითხები განიხილეს.
ამასთან, მხარეებმა რეგიონული უსაფრთხოების საკითხებზე მსჯელობისას ყურადღება იმ გამოწვევებზეც გაამახვილეს, რომელიც არა მხოლოდ სამხრეთ კავკასიის რეგიონის, არამედ მთელ დემოკრატიულ საზოგადოების წინაშე დგას.
დავით უსუფაშვილის განცხადებით, ევროპელ სტუმართან შეხვედრაზე ისაუბრეს საერთო საფრთხეებზე, რომელიც არა მხოლოდ საქართველოს, არამედ მთელ დემოკრატიულ სამყაროს ემუქრება.
„ამ თვალსაზრისით, ეუთო საქართველოს უყურებს როგორც ძალიან მნიშვნელოვან ქვეყანას უსაფრთხოების სისტემაში. ის პრობლემები, რომლებიც დიდი ხნის განმავლობაში, ჩვენ პრობლემებად მიგვაჩნდა და სხვები ამას საქართველოს პრობლემად თვლიდნენ, კერძოდ, რუსეთიდან მომავალი საფრთხეები, დღეს ყველას მიერ გაცნობიერებულია როგორც საერთო პრობლემა. ეს პოზიტიური მიდგომაა, რომ საქართველო კოლექტიური მცდელობის პროცესშია, რათა რუსული საფრთხე შევაჩეროთ და იმას მივაღწიოთ, რასაც მთელი მსოფლიო, რუსეთისა და კიდევ სამი ქვეყნის გარდა, სრულიად ცალსახად ხედავს, რომ საქართველო ერთიანი და მთლიანი სახელმწიფოა“, - დასძინა უსუფაშვილმა.

პარლამენტის თავმჯდომარესთან გამართულ შეხვედრას საქართველოში გერმანიის ფედერაციის საგანგებო და სრულუფლებიანი ელჩიც დაესწრო.