ბიძინა ივანიშვილმა დაამთავრა „ნაციონალური მოძრაობა“, სისხლიანი რეჟიმი, ქვეყანაში დაისადგურა მშვიდობამ, სტაბილურობამ - კალაძე

ამ ერთმა ადამიანმა დაამთავრა „ნაციონალური მოძრაობა“, დაამთავრა ის სიბინძურე, ის სისხლიანი რეჟიმი, რაც ქვეყანაში ხდებოდა. ქვეყანაში დაისადგურა მშვიდობამ, სტაბილურობამ, განვითარებამ, - ამის შესახებ თბილისის მერმა, კახა კალაძემ განაცხადა.

კალაძემ კომენტარი გააკეთა „საერთაშორისო გამჭვირვალობის“ მიერ გამოქვეყნებული 2022 წლის „კორუფციის აღქმის ინდექსის“ შესახებ სტატიაზე, რომელშიც საუბარი ბიძინა ივანიშვილზეც.

„ამ ერთმა ადამიანმა დაამთავრა „ნაციონალური მოძრაობა“, დაამთავრა ის სიბინძურე, ის სისხლიანი რეჟიმი, რაც ქვეყანაში ხდებოდა. ქვეყანაში დაისადგურა მშვიდობამ, სტაბილურობამ, განვითარებამ. არ მინდა, ვინმემ იფიქროს ის, რომ დღეს ყველაფერი იდეალურად არის, ყველაფერი კარგად არის და ვართ უბედნიერესები. ცხადია, უამრავი გამოწვევაა, უამრავი პრობლემაა, მაგრამ ვართ იმისთვის საზოგადოებასთან ერთად, რომ ღირსეულად ვუპასუხოთ ამ გამოწვევებს. დღეს ბიძინა ივანიშვილი არ არის პოლიტიკაში, ის პოლიტიკიდან გასულია, ეწევა ქველმოქმედებას, უამრავი კეთილი საქმე აქვს გაკეთებული და დააკვირდით მის მიერ განხორციელებულ საქველმოქმედო საქმიანობას, როგორ ციტირებთ, როგორ მიაწვდით ინფორმაციის სახით ხალხს. ავიღოთ იპოდრომის ტერიტორია, „ლაგუნა ვერეს“ გადმოცემა, ყველაფერს გადმოსცემთ თითქოს რაღაცა უბედურება ხდება და საზიანო კეთდება ჩვენი ქალაქისთვის. არადა, რეალობა, პირიქით განსხვავებულია, ყველაფერი კეთდება ამ ქალაქის და ქვეყნის საკეთილდღეოდ, წარმატებისთვის და განვითარებისთვის“, – განაცხადა კალაძემ.