სააკაშვილი თუ წონაში კლებას გააგრძელებს, მოკვდება - ნევროლოგი თენგიზ წულაძე

თბილისის საქალაქო სასამართლოში ექსპრეზიდენტ მიხეილ სააკაშვილისთვის მისი ჯანმრთელობის მდგომარეობის გამო, სასჯელის გადავადების ან მისგან სრულად გათავისუფლების შესახებ სასამართლო სხდომა მიმდინარეობს. პროცესზე გამოიკითხა ნევროლოგო თენგიზ წულაძე, რომელიც ყოფილი სახალხო დამცველის, ნინო ლომჯარიას მიერ შექმნილი სამედიცინო კონსილიუმის ერთ-ერთი წევრია.

წულაძის თქმით, თუ სააკაშვილის სხეულის წონა 52 კგ-ზე ნაკლები იქნება, მისი ორგანიზმი ვეღარ გაუძლებს და მოკვდება.

"თუ პაციენტი წონაში კლებას გააგრძელებს და სხეულის მასის ინდექსი 14-ზე ნაკლებზე ჩამოვა ანუ 52 კილოზე ნაკლებზე ჩამოვა, მოკვდება, ადამიანი მეტს ვეღარ გაუძლებს" - განაცხადა თენგიზ წულაძემ.

პროცესზე მიხეილ სააკაშვილის ადვოკატმა, შალვა ხაჭაპურიძემ ექიმს ჰკითხა, ექსპრეზიდენტი საჭმელს ვერ ჭამს, თუ არ ჭამს.

"თავიდან, როცა მიხეილ სააკაშვილმა შიმშილობა დაიწყო, მაშინ ალბათ არ ჭამდა და ახლა ვეღარ ჭამს. ანორექსია და კახექსია მადის დაქვეითებასა და გულისრევას იწვევს. თან ეს არ არის პაციენტის მართვადი, ასე ადვილად ვერ მართავს ამ ამბავს, მას მკურნალობის თავისი პროტოკოლი აქვს, საკმაოდ რთული". - უპასუხა თენგიზ წულაძემ.

ექიმის თქმით, სააკაშვილის ამჟამინდელ მდგომარეობაში წონის კლება ყველაზე მნიშვნელოვანი ფაქტორია, და თუ ამ ტემპით გაგრძელდება, შესაძლოა, "მძიმე შედეგები მოჰყვეს".

წულაძის თქმით, სააკაშვილის შემთხვევაში კახექსია, სავარაუდოდ, მხოლოდ შიმშილით არ არის გამოწვეული, რაზეც მიუთითებს მისი სხვა სიმპტომებიც და ისიც, რომ პაციენტი თითქმის იმავე ოდენობით საკვებს იღებს რასაც მანამდე, თუმცა წონის კლების ტემპი აჩქარებულია.