რუსეთთან მოლაპარაკების დაწყება გამორიცხულია, რადგან კრემლი შეეცდება ეს ომის გაყინვისთვის გამოიყენოს - ოლაფ შოლცი

ამჟამად, უკრაინაში საბრძოლო მოქმედებების შეწყვეტა და რუსეთთან მოლაპარაკების დაწყება გამორიცხულია, რადგან კრემლი შეეცდება ეს ომის გაყინვისთვის გამოიყენოს. ამის შესახებ გერმანიის კანცლერმა ოლაფ შოლცმა ბერლინში, უკრაინის პრეზიდენტ ვოლოდიმირ ზელენსკისთან ერთობლივ ბრიფინგზე განაცხადა.  

 „უკრაინა მზად არის მშვიდობისთვის, მაგრამ მას სრულიად გასაგებად და სამართლიანად სურს, რომ ეს არ იყოს რუსეთის მხრიდან ომის გაყინვისა და დიქტატის მცდელობა“, - განაცხადა კანცლერმა.

შოლცმა აღნიშნა, რომ რუსეთმა განახორციელა იმპერიალისტური, აგრესიული თავდასხმა უკრაინაზე, ამიტომ ევროპის მშვიდობა და უსაფრთხოება დღეს საფრთხის ქვეშაა. კანცლერი დარწმუნებულია, რომ მშვიდობაზე ლაპარაკი საჭიროა, მაგრამ ზელენსკის მიერ შეთავაზებული სამშვიდობო გეგმის კონტექსტში.

„რუსეთმა უნდა გაიყვანოს ჯარები, იმიტომ, რომ ამის გარეშე სალაპარაკო არაფერია. ამ გზავნილს გადავცემ სხა ქვეყნებს, როდესაც ვხვდები სხვა სახელმწიფოების ლიდერებს“, - განაცხადა შოლცმა და აღნიშნა, რომ გერმანია მხარს დაუჭერს უკრაინას იმდენ ხანს, რამდენიც საჭირო იქნება.

უკრაინის პრეზიდენტი ვოლოდიმირ ზელენსკი ბერლინში დღეს ჩავიდა, ის უკვე შეხვდა გერმანიის პრეზიდენტს ფრანკ ვალტერ შტაინმაიერს.