რუსეთის მიერ უკრაინაზე იერიშის შედეგად დაიღუპა 12 და დაშავდა 76 ადამიანი, ოკუპანტებმა დაბომბეს საცხოვრებელი კორპუსები, სამშობიარო და სხვა სამოქალაქო ობიექტები

29 დეკემბერს, დილით, უკრაინის წინააღმდეგ რუსეთის მიერ განხორციელებული იერიშის შედეგად დაიღუპა სულ მცირე 12 ადამიანი, ხოლო 76 დაშავდა. ამის შესახებ უკრაინის შინაგან საქმეთა მინისტრმა იგორ კლიმენკომ განაცხადა.

კლიმენკოს ინფორმაციით, კიევში დაიღუპა 2 ადამიანი, 18 დაშავდა. დაზიანდა სამოქალაქო ინფრასტრუქტურა, ავტომობილები, სასაწყობე ნაგებობები.

ლვოვის ოლქში აფეთქების შედეგად დაზიანდა საცხოვრებელი კორპუსი, დაიღუპა ერთი ადამიანი, ხოლო 9 დაშავდა,

დნიპროპეტროვსკის ოლქში მტერმა დაბომბა სავაჭრო ცენტრი, დაიღუპა 5 და დაშავდა 15 ადამიანი. რუსული ჭურვი მოხვდა სამშობიაროს. მაშველებმა 4 პაციენტი გადაარჩინეს.

ოდესის ოლქში რუსეთის ძალებმა დაბომბეს სამსართულიანი საცხოვრებელი სახლი. ნანგრევების ქვეშ შესაძლოა იყვნენ ადამიანები. ასევე ოდესაში დაზიანებულია სულ მცირე ორი სახლი. 17-სართულიანი კორპუსიდნ მაშველებმა 23 მოქალაქე გადაარჩინეს. მინისტრის თქმით, ოდესის ოლქში დაიღუპა 2 ადამიანი, ხოლო 15 დაშავდა.

კლიმენკოს ინფორმციით, ხარკოვის ოლქში დაიღუპა ერთი ადამიანი, ცხრა დაშავდა. ექიმებმა დაშავებულებს სამედიცინო დახმარება ადგილზე გაუწიეს.

ზაპოროჟიეს ოლქში ოკუპანტებმა სარაკეტო დარტყმები განახორციელეს ინფრასტრუქტურის ობიექტებზე - დაიღუპა ერთი და დაშავდა 10 ადამიანი.