ბადრი ჯაფარიძის განცხადებით, სტრასბურგის სასამართლომ მისი და მამუკა ხაზარაძის სარჩელის განხილვა დაიწყო

სტრასბურგის სასამართლომ დაიწყო მამუკა ხაზარაძის და ჩემი სარჩელის განხილვა საქართველოს სასამართლოს გადაწყვეტილებაზე, რომლითაც ჩვენ გაგვამტყუნეს, ვითომდაც თაღლითობის ჩადენის გამო. სასამართლომ უპრეცედენტოდ მოკლე ვადებში დაიწყო განხილვა და ამ საქმეს მიენიჭა პრიორიტეტი, – ამის შესახებ პარტია „ლელოს“ წევრმა, ბადრი ჯაფარიძემ განაცხადა.

„გვინდა, საზოგადოებას გავაცნოთ ძალიან მნიშვნელოვანი ინფორმაცია იმასთან დაკავშირებით, რომ სტრასბურგის ადამიანის უფლებათა ევროპულმა სასამართლომ მიიღო მამუკა ხაზარაძის და ჩემი სარჩელი საქართველოს სასამართლოს მიერ მიღებულ გადაწყვეტილებაზე, რომლითაც ჩვენ გაგვამტყუნეს, ვითომდაც თაღლითობის ჩადენის გამო. ეს სარჩელი იქნა არა მხოლოდ მიღებული, არამედ უკვე სასამართლომ დაიწყო განხილვა უპრეცედენტოდ მოკლე ვადებში და ამ საქმეს მიენიჭა პრიორიტეტი. ჩვენ ვხედავთ, რომ რუსეთის ფედერაციაში ოპონენტებს ფიზიკურად უსწორდებიან და კლავენ. საქართველოში ცდილობენ, რომ ოპონენტებს გაუსწორდნენ სხვაგვარად, მორალურად მოკლან ისინი. ოთხი წელია, მიმდინარეობს მამუკა ხაზარაძის და ჩემი მორალური მოკვლის მცდელობა. ეს დაიწყო ბიძინა ივანიშვილმა და ამ მცდელობაში მონაწილეობს „ქართული ოცნების“ ყველა სპიკერი, რომელიც ამ წლების განმავლობაში გვიწოდებს ხანდაზმულ თაღლითს, მოროდიორს, ბანდიტს, ფულის გამთეთრებელს. რა თქმა უნდა, მათი იმედი არის, რომ სრულად აკონტროლებენ პროკურატურას და სასამართლოს, შეუძლიათ, გამოიყენონ ჩვენ წინააღმდეგ საქართველოს ფარგლებში, მაგრამ მათ ხელი არ მიუწვდებათ ევროპულ სასამართლოზე. ჩვენ ამიტომ დავიწყეთ ეს პროცესი, რათა ერთხელ და სამუდამოდ დავამარცხოთ პოლიტიზირებული მართლმსაჯულება. ამიტომ მივმართეთ სტრასბურგის ადამიანის უფლებათა სასამართლოს, რომელმაც  ასეთი უპრეცედენტო გადაწყვეტილება მიიღო. ჩვენ მორალური მკვლელობის მცდელობას ვუპასუხეთ გაძლიერებით, იმით, რომ ჩვენი მცდელობა, ქვეყანაში დასრულდეს პოლიტიკური მართლმსაჯულება, აუცილებლად შედეგს გამოიღებს და აღარასოდეს არავინ აღარ იქნება დევნილი პოლიტიკური ნიშნით. ყველა ცენტრალურ საკითხზე, რომელიც სარჩელში დავაყენეთ, სტრასბურგის სასამართლომ ჩათვალა, რომ ჩვენი პოზიცია არის დასაბუთებეული და საქართველოს ხელისუფლებას მოსთხოვა დაუყოვნებლივ პასუხის გაცემა“, – განაცხადა ბადრი ჯაფარიძემ.