აშშ-ის პრეზიდენტმა დონალდ ტრამპმა ყურადღება უნდა გაამახვილოს უკრაინაში მიმდინარე ომის დასრულებაზე და არა ევროპასთან სავაჭრო დაპირისპირებაზე. ამის შესახებ საფრანგეთის პრეზიდენტმა ემანუელ მაკრონმა CNN-თან ინტერვიუში განაცხადა.

"ჩვენ უნდა გადავწყვიტოთ უკრაინის პრობლემა. ჩვენ უნდა მოვაგვაროთ სიტუაცია ახლო აღმოსავლეთში. ჩვენ გვაქვს კონკურენცია აშშ-სა და ჩინეთს შორის...

არის თუ არა ევროკავშირი თქვენი მთავარი პრობლემა? არა, მე ასე არ ვფიქრობ. თქვენი პირველი პრობლემა ჩინეთია, ამიტომ ამაზე კონცენტრირება გჭირდებათ. ”ევროპა თქვენი მოკავშირეა”, - თქვა მაკრონმა.

მაკრონმა აღნიშნა, რომ ტრამპთან კარგ ურთიერთობას ინარჩუნებს. მან ხაზგასმით აღნიშნა, რომ ტარიფების გაზრდა ასევე დააზარალებს ამერიკის ეკონომიკას, რადგან აშშ-სა და ევროკავშირს შორის ეკონომიკური კავშირები საკმაოდ მჭიდროა.

„თუ თქვენ დააწესებთ ტარიფებს ეკონომიკის რამდენიმე სექტორზე, ეს გაზრდის ხარჯებს და შექმნის ინფლაციას შეერთებულ შტატებში.  ნუთუ ეს ნამდვილად სურს თქვენს ხალხს?" - აღნიშნა საფრანგეთის პრეზიდენტმა.

მაკრონმა დაადასტურა, რომ ევროპა შეერთებული შტატების მოკავშირეა. მან ტრამპს ევროკავშირთან სავაჭრო ომის დასრულებისკენ მოუწოდა.

„თუ გსურთ, რომ ევროპამ მეტი ინვესტიცია განახორციელოს და უსაფრთხოებისა და თავდაცვის ვალდებულება აიღოს, ვფიქრობ, შეერთებული შტატების ინტერესებში შედის, არ შეუტიოს ევროპას და არ დაემუქროს მას ტარიფებით“, - დასძინა საფრანგეთის პრეზიდენტმა.