იმედი მაქვს, კრემლი ხვდება, რომ პრეზიდენტ ტრამპთან თამაში არ ღირს - ფინეთის პრეზიდენტი

ის ფაქტი, რომ აშშ-ის პრეზიდენტი დონალდ ტრამპი უკრაინაში ომის გამო მოთმინებას კარგავს, საბოლოოდ უნდა აიძულებდეს რუსეთს, შეწყვიტოს დროის გაყვანა. ამის შესახებ ფინეთის პრეზიდენტმა ალექსანდრ სტუბმა The New York Times-თან ინტერვიუში განაცხადა.

ამავდროულად, მან აღიარა, რომ უკრაინას, სავარაუდოდ, ტერიტორიულ კომპრომისებზე წასვლა მოუწევს ბრძოლის ველზე არსებული ვითარების გათვალისწინებით.

გამოცემამ გამოთქვა ვარაუდი, რომ ტრამპი სტუბის აზრს უსმენს, რადგან ფლორიდაში გოლფის ერთად თამაშიდან ერთი დღის შემდეგ, აშშ-ის პრეზიდენტმა განაცხადა, რომ კრემლზე „გაბრაზებული“ იყო და რუსული ნავთობის შემძენ ქვეყნებს სანქციებით დაემუქრა.

და სულ რაღაც რამდენიმე საათში, რაც ტრამპი და სტუბი ვატიკანში რომის პაპ ფრანცისკეს დაკრძალვაზე გვერდიგვერდ ისხდნენ, ამერიკის პრეზიდენტმა მკაცრი განცხადება გააკეთა რუსეთის მიერ უკრაინის ქალაქებზე დარტყმების შესახებ.

თუმცა, გამოცემა აღნიშნავს, რომ თავად სტუბი არაეთანხმება იმ მოსაზრებას, რომ მას გავლენა აქვს ტრამპზე და თქვა, რომ საფრანგეთის პრეზიდენტი ემანუელ მაკრონი და ბრიტანეთის პრემიერ-მინისტრი კირ სტარმერი ხელმძღვანელობენ ევროპულ მცდელობებს უკრაინაში ომის დასრულებისთვის და მისი როლი მხოლოდ „საქმის სწორი მიმართულებით წარმართვაა“.

მისი თქმით, აშშ-ის პრეზიდენტთან ბოლო საუბრის შემდეგ ის მიხვდა, რომ ტრამპი გაღიზიანებულია.

„პრეზიდენტს მოთმინება ეწურება და ჩვენ საკმაოდ მკაცრი განცხადებები მოვისმინეთ პუტინისა და რუსეთის შესახებ.

ამიტომ, უბრალოდ იმედი მაქვს, რომ კრემლი ხვდება, რომ პრეზიდენტ ტრამპთან თამაში არ ღირს“, - თქვა სტუბმა და დასძინა, რომ ამან შეიძლება „სინამდვილეში საქმეები სწორი მიმართულებით წაიყვანოს“, რადგან რუსეთს იძულებულს გახდის, შეწყვიტოს მოლაპარაკებების შეფერხება.

სტუბის თქმით, სახელმწიფოებრიობა შედგება მიწის, სუვერენიტეტისა და დამოუკიდებლობისგან და ფინეთმა დაკარგა სამიდან ორი 1940-იან წლებში.

ფინეთის პრეზიდენტის განცხადებით, სურვილი ჰქონდა, უკრაინას სამივე შეენარჩუნებინა, მაგრამ ახლა შესაძლებლად მიიჩნევს უკრაინის მხრიდან ტერიტორიების დათმობას.

„სამიდან ორს მაინც თუ მივიღებთ უკრაინისთვის, ვფიქრობ, ეს შესანიშნავია, მაგრამ ფინეთი არასოდეს აღიარებს იმ ტერიტორიებს, რომლებიც ამ ომის დროს რუსეთის მიერ არის ანექსირებული“, – აღნიშნა ალექსანდერ სტუბმა.