მექსიკაში მერობის კანდიდატი, საარჩევნო კამპანიის დროს პირდაპირ ეთერში მოკლეს

მექსიკის შტატ ვერაკრუსში, ტეკისტეპეკის მერობის კანდიდატი, ესენია ლარა გუტიერესი, წინასაარჩევნო კამპანიის დროს მოკლეს. თავდასხმის შედეგად კიდევ სამი ადამიანი დაიღუპა და სამი დაშავდა. ამის შესახებ ინფორმაციას CNN ავრცელებს.

გავრცელებული ინფორმაციით, თავდასხმა 11 მაისის საღამოს, ტეკისტეპეკში, საჯარო ღონისძიების დროს მოხდა, რომელიც Facebook-ზე პირდაპირ ეთერში გადაიცემოდა.

ვიდეოში ჩანს, როგორ ესალმება მმართველი პარტია „მორენას“ კანდიდატი ადგილობრივ მოსახლეობას და მხარდამჭერებთან ერთად ქუჩაში გადაადგილდება. ხალხი სკანდირებს, რა დროსაც მოულოდნელად დაახლოებით 20 გასროლის ხმა გაისმა.

ვერაკრუსის გენერალური პროკურორის ოფისის ცნობით, თავდასხმის შედეგად ოთხი ადამიანი, მათ შორის გუტიერესი, დაიღუპა, ხოლო სამი დაშავდა.

„ჩვენ ვაკოორდინებთ ჩვენს ქმედებებს, მათ შორის უსაფრთხოების მინისტრთან და ვერაკრუსის შტატის ხელისუფლებასთან ერთად ვუზრუნველყოფთ ყველა საჭირო მხარდაჭერას ამ საარჩევნო პერიოდში“, - განაცხადა მექსიკის პრეზიდენტმა კლაუდია შეინბაუმმა პრესკონფერენციაზე.

როგორც მედია წერს, მექსიკაში საარჩევნო პროცესის დროს პოლიტიკოსებზე, განსაკუთრებით ადგილობრივი თანამდებობის კანდიდატებზე თავდასხმები გახშირდა. ადამიანის უფლებათა დამცველი ორგანიზაცია Data Cívica-ს მონაცემებით, გასულ წელს ქვეყანაში პოლიტიკურ აქტივობასთან დაკავშირებულ ადამიანებზე ან ადგილებზე თავდასხმის რეკორდული - 661 შემთხვევა დაფიქსირდა. მსხვერპლთა უმეტესობა მუნიციპალურ თანამდებობებს იკავებდა ან არჩევნებში იყრიდა კენჭს.

2024 წლის მაისში, ჰერეროს შტატში წინასაარჩევნო მიტინგის დროს მერობის კანდიდატი მოკლეს. რამდენიმე დღის შემდეგ, მიჩოაკანის შტატში, კოტიხას ქალაქის მერს იმ დროს ესროლეს, როდესაც ის სპორტდარბაზიდან სახლში ბრუნდებოდა. ოქტომბერში, ჩილპანსინგოს ახლადარჩეული მერი არჩევიდან ერთ კვირაზე ნაკლებ დროში მოკლეს.