ვერავის მივცემთ საშუალებას, შავი, გაუმჭვირვალე ფულით, საქართველოში მოგვიწყონ რევოლუციები, ამას ვერ მოაწყობენ, მცდელობაც უნდა იყოს წინასწარ აღკვეთილი - ირაკლი კობახიძე

ჩვენ ვერავის მივცემთ საშუალებას, შავი ფულით, გაუმჭვირვალე ფულით საქართველოში მოგვიწყონ რევოლუციები. ამას ვერ მოაწყობენ, მაგრამ მცდელობაც უნდა იყოს წინასწარ აღკვეთილი, – ამის შესახებ საქართველოს პრემიერ-მინისტრმა, ირაკლი კობახიძემ ჟურნალისტებს განუცხადა.

მისი თქმით, გამჭვირვალობა არ არის დისკრედიტაცია.

„თავის დროზე აბსოლუტურად ყალბი განცხადებები კეთდებოდა, თითქოს დასავლეთიდან არაფერი ცუდი, არ შეიძლება, წამოვიდეს დაფინანსების სახით. ამ დროს თავად დასავლეთმა აღიარა, რომ „იუესეიდი“, „ნედი“, „იდი“ და სხვა ფონდები გამოიყენებოდა რევოლუციური სცენარის განსახორციელებლად. ტრამპის ადმინისტრაციამ თქვა, რომ სხვადასხვა ქვეყანაში რევოლუციებისთვის გამოიყენებოდა. ამის შემდეგ, გახსოვთ, ილიონ მასკმა გაავრცელა ვიდეო, სადაც საქართველოს მაგალითიც იყო მოყვანილი ამ კონტექსტში, რომ „იუესეიდი“და „ნედი“ ხელს უწყობდნენ სხვადასხვა ქვეყანაში რევოლუციების მოწყობას. ისედაც ხომ ყველამ ვიცით, რომ საქართველოში გვქონდა რევოლუციის მოწყობის ოთხი მცდელობა გასული ოთხი წლის განმავლობაში, ამაში პირდაპირ იყო ჩართული „იუესეიდი“, „ნედი“, ამერიკის ყოფილი ელჩი, შესაბამისად, ყველაფერი არის დღესავით ნათელი. ჩვენ ვერავის მივცემთ იმის საშუალებას, შავი ფულით, გაუმჭვირვალე ფულით საქართველოში მოგვიწყონ რევოლუციები. ამას ვერ მოაწყობენ, მაგრამ მცდელობაც უნდა იყოს წინასწარ აღკვეთილი“, – განაცხადა პრემიერ-მინისტრმა.