საქართველოში რუსული ენის პოპულარიზაციისთვის ვიმუშავებთ - რუსი დიპლომატი

საქართველოში შვეიცარიის საელჩოს რუსული ინტერესების სექციის ახალი ხელმძღვანელის, დმიტრი ოლისოვის თქმით, სექცია საქართველოში რუსული ენის პოპულარიზაციისთვის მუშაობას გააგრძელებს. იუწყება რუსული  სახელმწიფო საინფორმაციო სააგენტო "ტასი".

„რუსული ენის პოპულარიზაცია საზღვარგარეთ რუსეთის ჰუმანიტარული პოლიტიკის ერთ-ერთი პრიორიტეტული სფეროა. ჩვენი მთავარი ამოცანაა რუსული ენის კონკურენტუნარიანობის ხელშეწყობა, რუსული კულტურისა და მეცნიერების მიღწევებზე საყოველთაო თავისუფალი წვდომის გარანტიების შექმნა, ენის შესწავლის, რუსულ ენაზე განათლების მიღების შესაძლებლობების უზრუნველყოფა. მინდა დაგარწმუნოთ, რომ ინტერესების სექცია, მთელი მისი შემადგენლობა, გააგრძელებს მუშაობას ამ მნიშვნელოვანი მიმართულებით“, - განაცხადა ოლისოვმა რუსული ენის დღისადმი მიძღვნილ საღამოზე, რომელიც რუსეთის ინტერესთა სექციაში გაიმართა.

დიპლომატმა ასევე აღნიშნა, რომ რუსულ ენაზეა დაწერილი მრავალი ნაწარმოები ცნობილი ქართველი მწერლებისა, რომლებიც „არა მხოლოდ ქმნიდნენ, არამედ რუსულად აზროვნებდნენ კიდეც“, - წერს "ტასსი".