უკრაინამ რუსეთის ასტრახანის ოლქში მდებარე პორტში დაბომბა გემი, რომელიც ირანული დრონების ნაწილებითა და საბრძოლო მასალით იყო დატვირთული

14 აგვისტოს, უკრაინის შეიარაღებული ძალების სპეციალური ოპერაციების ძალების დანაყოფებმა, თავდაცვის ძალების სხვა კომპონენტებთან ერთად, თავდასხმა განახორციელეს რუსეთის ფედერაციის ასტრახანის ოლქში მდებარე ოლიას რუსეთის საზღვაო პორტზე, რის შედეგადაც საბრძოლო მასალის გადამზიდავი  ტვირთმზიდი გემი დაბომბეს.

ამის შესახებ ინფორმაციას უკრაინის შეიარაღებული ძალების გენშტაბი ავრცელებს.

„არსებული ინფორმაციით, დაბომბეს გემი „პორტ ოლია-4“, რომელიც ირანიდან „შაჰედის“ ტიპის უპილოტო საფრენი აპარატის ნაწილებითა და საბრძოლო მასალით იყო დატვირთული. თავდასხმის შედეგები დგინდება“.

აღნიშნულია, რომ რუსები ოლიას პორტს ირანიდან სამხედრო ტვირთების მიწოდების მნიშვნელოვან ლოჯისტიკურ პუნქტად იყენებენ. ოლია საზღვაო პორტია რუსეთის ასტრახანის ოლქის ლიმანსკის რაიონის სოფელ ოლიაში.