რუსტემ უმეროვი უარყოფს ინფორმაციას, რომ უკრაინა შეერთებული შტატების ახალ „სამშვიდობო გეგმას“ დათანხმდა

უკრაინის ეროვნული უსაფრთხოებისა და თავდაცვის საბჭოს მდივანი რუსტემ უმეროვი უარყოფს შეერთებულ შტატებთან ახალი „სამშვიდობო შეთანხმების“ „კოორდინაციას“ და ხაზს უსვამს, რომ უკრაინის ხელისუფლება ყურადღებით განიხილავს პარტნიორების წინადადებებს უკრაინის უცვლელი პრინციპების ფარგლებში.

უმეროვის თქმით, კიევში ამერიკული დელეგაციის მუშაობა გრძელდება, თუმცა საჯარო სივრცეში კონსულტაციების შინაარსთან დაკავშირებით სპეკულაციები ჩნდება.

უმეროვი აღნიშნავს, რომ შეერთებულ შტატებში საქმიანი ვიზიტის დროს მან წმინდა ტექნიკური დავალება შეასრულა - შეხვედრების ორგანიზება და დიალოგისთვის მომზადება.

„მე არ მიმიცია არანაირი შეფასება, მით უფრო, რომელიმე დებულების დამტკიცება. ეს ჩემს უფლებამოსილებაში არ შედის და არ შეესაბამება პროცედურას“, - წერს უმეროვი სოციალურ ქსელში.

როგორც უმეროვმა განმარტა, 20 ნოემბერს უკრაინის პრეზიდენტი ესაუბრა ამერიკულ დელეგაციას, რომელთაც უფლებამოსილება დონალდ ტრამპმა მიანიჭა. უმეროვის თქმით, უკრაინული  მხარე ყურადღებით იკვლევს პარტნიორების ყველა წინადადებას.

„პუბლიკაციებს მედიაში სავარაუდო „შეთანხმების“ ან „პუნქტების ამოღების“ შესახებ არაფერი აქვს საერთო რეალობასთან. ეს არის კონსულტაციების შესახებ კონტექსტიდან ამოგლეჯილი დაუდასტურებელი ინფორმაციის მაგალითები. ჩვენ საფუძვლიანად ვმუშაობთ პარტნიორების წინადადებებზე უკრაინის უცვლელი პრინციპების – სუვერენიტეტის, ჩვენი ხალხის უსაფრთხოებისა და სამართლიანი მშვიდობის ფარგლებში“, – წერს უმეროვი.