ევროპარლამენტში პოლიტიკურ საკითხთა, ადამიანის უფლებათა დაცვისა და დემოკრატიის კომიტეტის სხდომა გაიმართა

ბრიუსელში, ევრონესტის საპარლამენტო ასამბლეის პოლიტიკურ საკითხთა, ადამიანის უფლებათა დაცვისა და დემოკრატიის კომიტეტის სხდომა გაიმართა, სადაც საგარეო პოლიტიკური და გარე საფრთხეების მიმართულებით ევროკავშირის წევრი სახელმწიფოებისა და აღმოსავლეთ ევროპის პარტნიორი ქვეყნების საერთო პოზიციები და გამოწვევების შესახებ რეზოლუციის პროექტი განიხილეს.

დოკუმენტში სხვადასხვა დელეგაციის წარმომადგენლების მიერ 111 ცვლილება იყო წარმოდგენილი. საქართველოს დელეგაციის წევრმა, გიორგი ვოლსკიმ რეზოლუციაში დამატების სახით აფხაზეთის და ცხინვალის რეგიონის ოკუპაციაზე და 2008 წლის ომის შემდგომ მიღწეული შეთანხმების შესრულების აუცილებლობაზე ითხოვა ყურადღების გამახვილება, რომელიც ევრონესტის წევრებმა გაიზიარეს და რეზოლუციაში მის ასახვას მხარი დაუჭირეს. 

კომიტეტის წევრებმა დადებითად შეაფასეს იმ დამატების შეტანასაც, რომელიც საქართველოს მიერ განხორციელებულ წარმატებულ რეფორმებს ეხება.

სხდომაზე, ევროპაში არსებულ საგარეო-პოლიტიკურ და უსაფრთხოების ვითარება მიმოიხილეს. ევრონესტის საპარლამენტო ასამბლეა გამოეხმაურა დღევანდელ მდგომარეობას როცა ევროკავშირისა და აღმოსავლეთ ევროპის ქვეყნების მეზობელი სახელმწიფოები, ირიბად თუ პირდაპირ ჩართულნი არიან კონფლიქტებში. როგორც აღინიშნა, ამ ვითარების მოგვარება საერთო ძალისხმევას საჭიროებს.

რეზოლუციაში აღწერილია პარტნიორი ქვეყნების ერთობლივი ქმედებების განხორციელების მნიშვნელობა ისეთ გლობალურ საკითხებთან დაკავშირებით, როგორიცაა მშვიდობა, უსაფრთხოება, ადამიანის უფლებები, განიარაღება და ტერორიზმი.
ასამბლეამ მნიშვნელოვან მიღწევად აღიარა ევროკავშირთან ასოცირების ორმხრივი შეთანხმების ხელმოწერა საქართველოს, მოლდოვას და უკრაინის მიერ, რისი მეშვეობითაც მათ პირობა დადეს მხარი დაუჭირონ და წვლილი შეიტანონ მშვიდობის და სტაბილურობის განვითარების უზრუნველყოფაში რეგიონალურ და საერთაშორისო დონეზე.

კომიტეტის სხდომაზე გახილულ რეზოლუციის პროექტს უკვე პლენარულ სხდომაზე მიიღებენ. დღეს გამართულ სხდომას საქართველოს პარლამენტიდან, გიორგი ვოლსკი, ეკა ბესელია, დავით დარჩიაშვილი, ჩიორა თაქთაქიშვილი და ვიქტორ დოლიძე ესწრებოდნენ.