აშშ რუსეთს მოუწოდებს ავიადარტყმები მხოლოდ „ისლამური სახელმწიფოს“ წინააღმდეგ განახორციელოს

თეთრმა სახლმა რუსეთს მოუწოდა სირიაში ავიადარტყმები „ისლამური სახელმწიფოს“ წინააღმდეგ ზუსტად განახორციელოს. თეთრი სახლის განცხადებით, ორი ქვეყნის სამხედრო პირების მოლაპარკებები პირველ რიგში ამერიკელი მფრინავების უსაფრთხოებას ეხებოდა.

ამერიკის პრეზიდენტის პრეს-მდივნის ჯოშ ერნესტის ინფორმაციით, 1 ოტქომბერს გაიმართა ვიდეოკონფერენცია პენტაგონსა და რუსეთის თავდაცვის სამინისტროს შორის.

ერნესტმა შეშფოთება გამოთქვა იმის შესახებ, რომ რუსული თვითმფრინავები ავიადარტყმებს ახორციელებდნენ იმ რაიონებში, სადაც „ისლამური სახელმიწფოს“ მებრძოლების გადაადგილება არ შეინიშნებოდა. პრეს-მდივნის თქმით, აღნიშნულ რაიონებში იმყოფებოდნენ სირიის პრეზიდენტის ბაშარ ასადის შეიარაღებული მოწინააღმდგეები, რომლებსაც მხარს დასავლეთი უჭერს.

ერნესტის თქმით, სირიის ოპოზიციის წინააღმდეგ განურჩეველი საომარი მოქმედებების წარმოება საშიშია თავად რუსეთისთვისაც. „ ამან შესაძლოა მხოლოდ გააგრძელოს კონფლიქტი სირიის შიგნით და ის დაუსრულებელი გახადოს, ასევე არსებობს რისკი იმისა, რომ ამ კონფლიქტში თავად რუსეთიც აღმოჩნდეს ჩათრეული“, - აღნიშნა ერნესტმა.

რუსეთის ოფიციალური პირების მტკიცებით, ყველა განადგურებული სამიზნე ისლამისტებს ეკუთვნოდათ. რუსული მხარე ასევე გამორიცხავს რუსეთის ავიაციის მოქმედებების შედეგად მშვიდობიანი მოსახლეობის დაღუპვის ფაქტებს.