ზლატან იბრაჰიმოვიჩმა შესაძლოა კარიერა დაასრულოს

შვედეთის საფეხბურთო ნაკრებისა და ფრანგული კლუბის ”პარი სენ-ჟერმენის” ფეხბურთელმა ზლატან იბრაჰიმოვიჩმა შესაძლოა კარიერა დაასრულოს. 34 წლის თავდამსხმელს მომავალი სეზონისთვის უამრავი შეთავაზება აქვს, მაგრამ უცნობია, გააგრძელებს თუ არა ისევ თამაშს.

”ყველაფერი შეიძლება მოხდეს. შესაძლოა გავჩერდე. ვამჯობინებდი თამაშის დასრულებას ყველაზე მაღალ დონეზე, პიკზე ყოფნისას” ,- განუცხადა იბრაჰიმოვიჩმა მედიას. ფეხბურთელს ”პარი სენ-ჟერმენთან” კონტრაქტი გაზაფხულის ბოლოს უმთავრდება.

ზლატან იბრაჰიმოვიჩმა ფახბურთელის კარიერა შვედურ ”მალმეში” დაიწყო, ნაკრებში კი მისი დებიუტი 1999 წელს შედგა. კარიერის განმავლობაში ის ევროპის წამყვან კლუბებში - ჰოლანდიის ”აიაქსში” , იტალიის ”იუვენტუსში”, ”ინტერში”, მილანში” და ესპანეთის ”ბარსელონაში” თამაშობდა. ფორვარდმა თამაში ”პარი სენ-ჟერმენში” 2012 წლიდან დაიწყო. ეროვნულ ნაკრებში თამაშისას მის ანგარიშზე 100-ზე მეტი გოლია.