დღეიდან "ქართული ოცნება" და "რესპუბლიკელები" ერთმანეთის კონკურენტები ხდებიან

პარლამენტის თავმჯდომარე, დავით უსუფაშვილი აცხადებს, რომ პარტია "ქართული ოცნება" და "რესპუბლიკელები" დღეიდან პარტნიორობა-კონკურენციის რეჟიმში გადადიან. პრემიერ-მინისტრთან შეხვედრის შემდეგ, მან ასევე განაცხადა, რომ იზრუნებენ სახელმწიფოსა და პარტიების იმიჯზე.

"ჩვენს იმიჯს დააზარალებს სახელმწიფოს, ქვეყნისა და ხალხის წინაშე უპასუხისმგებლო მოქმედება. ჩვენს იმიჯს გააძლიერებს ჩვენი სახელმწიფოებრივი პოზიციები იმისთვის, რომ ჩვენი პარტიული პოზიციებიდან გამომდინარე კი არ ვავნოთ საქმეს, არამედ ვარგოთ. ეს გააძლიერებს ჩვენი და "ქართული ოცნების" იმიჯსაც", - განაცხადა უსუფაშვილმა.

დღეს ,,რესპუბლიკური პარტიის“ წარმომადგენლებმა განაცხადეს, რომ არჩევნებში დამოუკიდებლად იყრიან კენჭს. მათ ასევე განაცხადეს, რომ სამთავრობო თანამდებობებს მხოლოდ საკუთარი პოლიტიკური დღის წესრიგით, ან პრემიერ-მინისტრის გადაწყვეტილებით დატოვებენ.