გიორგი კვირიკაშვილი ჰანს დიტრიხ გენშერის გარდაცვალების გამო, მწუხარებას გამოთქვამს

საქართველოს პრემიერ-მინისტრი გიორგი კვირიკაშვილი ჰანს დიტრიხ გენშერის გარდაცვალების გამო, მწუხარებას გამოთქვამს.

,,მწუხარებას გამოვთქვამ თანამედროვეობის უდიდესი პოლიტიკოსის ჰანს დიტრიხ გენშერის გარდაცვალების გამო. იგი იმ პოლიტიკოსთა რიგს მიეკუთვნება, რომლებმაც მსოფლიოში მშვიდობას მიუძღვნეს თავისი მოღვაწეობა. 
ქართველი ხალხი ყოველთვის მადლიერებით გაიხსენებს იმ თანადგომას, რომელიც ჰანს დიტრიხ გენშერმა გამოიჩინა საქართველოს მიმართ ჩვენთვის ყველაზე რთულ წლებში. საქართველოს მთავრობის და პირადად ჩემი სახელით, თანაგრძნობას ვუცხადებ გერმანიის მთავრობას და გერმანელ ხალხს, დიდი პოლიტიკური მოღვაწის გარდაცვალების გამო, ვუსამძიმრებ მის ოჯახსა და ახლობლებს”, - აცხადებს გიორგი კვირიკაშვილი.  

გერმანიის საგარეო საქმეთა ყოფილი მინისტრი ჰანს-დიტრიხ გენშერი 89 წლის ასაკში გარდაიცვალა. როგორც დღეს მისმა პრესსამსახურმა გამოაცხადა, გარდაცვალების მიზეზად გულის დაავადება იქცა. გენშერმა, რომელიც სათავეში ედგა თავისუფალი დემოკრატების პარტიას, გერმანიის ისტორიაში ყველაზე დიდხანს იმსახურა საგარეო საქმეთა მინისტრად. მან მნიშვნელოვანი როლი შეასრულა ბერლინის კედლის დანგრევის შემდგომ მოვლენებში, ცენტრალურსა და აღმოსავლეთ ევროპაში კომუნისტური რეჟიმის დამხობის პროცესში. გენშერს ახლო მეგობრობა აკავშირებდა საბჭოთა კავშირის მაშინდელ საგარეო საქმეთა მინისტრთან და შემდგომ საქართველოს პრეზიდენტთან ედუარდ შევარდნაძესთან.