”ბოკო ჰარამმა” გატაცებული გოგონების ამსახველი ვიდეოკადრები გაავრცელა

ნიგერიის ისლამისტურმა დაჯგუფებამ ”ბოკო ჰარამმა” გამოაქვეყნა ვიდეო სავარაუდოდ იმის დასამტკიცებლად, რომ ორი წლის წინ გატაცებული სკოლის მოსწავლეები ცოცხლები არიან. ამის შესახებ ”სი ენ ენი” იუწყება.

ვიდეორგოლში ჩანს შავ ტანსაცმელში ჩაცმული 15 გოგონა, რომლებიც თავიანთ თავს სკოლიდან გატაცებულ მოსწავლეებს უწოდებენ. ვიდეოჩანაწერი ისლამისტებმა ნიგერიის ხელისუფლებას გაუგზავნეს.

ზოგიერთი გოგონა მშობლებმა ამოიცნეს.

ეს პირველი ვიდეოჩანაწერია 2014 წლის მაისის შემდეგ. სკოლის 267 მოსწავლის გატაცების შემდეგ სოციალურ ქსელსა და მსოფლიო მედიაში დაიწყო კამპანია ”დაგვიბრუნეთ ჩვენი შვილები”, რომელშიც მონაწილეობდნენ აშშ-ის პირველი ლედი და სხვა ცნობილი პირები.

ზოგიერთმა გოგონამ ტყვეობიდან გაქცევა მოახერხა, თუმცა 200-ზე მეტი მოსწავლე კვლავ უგზოუკვლოდ დაკარგულდაა მიჩნეული.

”ბოკო ჰარამის” მებრძოლები ბორნოს შტატში საჯარო სკოლას თავს 2014 წლის 14 აპრილს დაესხნენ.

მალე მათ გამოაქვეყნეს ვიდეო გატაცებული გოგონების შესახებ და მათი ტყვეებში გაცვლა მოითხოვეს.

დაჯგუფების ლიდერი აცხადებდა, რომ გოგონები გაამუსლიმეს და იმუქრებოდა, რომ მათ თავის მებრძოლებს მიათხოვებდა ან მონებად გაყიდიდა.