თბილისის გენერალურ გეგმაში ველობილიკების განვითარებაც იქნება ჩადებული - დავით ნარმანია

დედაქალაქის მერის დავით ნარმანიას განცხადებით, თბილისის გენერალურ გეგმაში ველობილიკების განვითარებაც იქნება ჩადებული. მისი განმარტებით, ეს მნიშვნელოვანია ცხოვრების ჯანსაღი წესის დამკვიდრებისა და მეორე მხრივ, სატრანსპორტო ნაკადების განვითარებისთვის.

„თბილისის მერიამ განაშენიანების გეგმა დაუკვეთა შემსრულებელ ორგანიზაციებს, ერთ-ერთი მიმართულება იყო ჩვენი მხრიდან ველობილიკების განვითარების შესაძლებლობები და შესაბამისი მიმართულებები. ეს გვექნება გენერალურ გეგმაში. გარდა ამისა, ხაზგასასმელია, რომ მდინარე ვერეს ხეობის განვითარების კონცეფციაში, რაც ახლახან მომზადდა გათვალისწინებულია ველობილიკების განვითარება მზიურის ტერიტორიასა და მიმდებარე ტერიტორიაზე. განვავითარებთ ველობილიკებს, ეს მნიშვნელოვანია ცხოვრების ჯანსაღი წესის დამკვიდრებისთვის და მეორე მხრივ, მნიშვნელოვანია სატრანსპორტო ნაკადების განვითარებისთვის. ქალაქის ფარგლებში სად იქნება შესაძლებელი ველობილიკების განვითარება, სრული სურათი გვექნება მოცემული გენერალური გეგმის ფარგლებში“, - განაცხადა დავით ნარმანიამ.