გორავ ჩოპრა საცოლეს საქართველოში ეძებს

საქართველო, თბილისი - 16:17 | 27.04.2016

ნანახია: 5059

ინდოელი მსახიობი გორავ ჩოპრა საცოლეს საქართველოში ეძებს. მსახიობი, რომელიც ქართველ მაყურებელში სერიალ "ორი ბედით" გახდა პოპულარული საქართველოზე და ქართველებზე შეყვარებულია, რასაც სხვადასხვა ინტერვიუში აფიქსირებს. გორავი 37 წლისაა და დაქორწინებული ჯერ არ ყოფილა.

მსახიობმა "ფანთაიმთან" იდეალური ქალი ასე აღწერა: „ჩემთვის იდეალურია ქალი, რომელშიც თანამედროვეობა და ტრადიციებისადმი პატივისცემაა შერწყმული. მას მორალური ღირებულებები უნდა ჰქონდეს და, სასურველია, ლოყები ეჭყლიტებოდეს (იღიმის). თუ საქართველოში ვიპოვი ადამიანს, რომელიც ღირსეულ ცოლობას გამიწევს, აუცილებლად დავოჯახდები“.

გორავ ჩოპრა იმასაც ჰყვება, თუ როგორ მოხვდა საქართველოში.

„ქართველი გულშემატკივრები Facebook-სა და Twitter-ზე მწერდნენ, მთხოვდნენ, საქართველოში ჩამოვსულიყავი. მოგვიანებით მედიაც დამიკავშირდა და ინტერვიუზე დავთანხმდი. ოთხი დაუვიწყარი დღე გავატარე ამ ქვეყანაში. ყველაფერი მომეწონა: ხალხი, ბუნება, კერძები, ღვინო, ტრადიციები, ქალაქები და სოფლები... ისეთი განცდა დამეუფლა, თითქოს საქართველოში ადრეც ვყოფილვარ და ყოველივე ეს მშობლიური იყო ჩემთვის. ქართველებთან უხილავი ძაფები მაკავშირებს. წინა ცხოვრებაში, ალბათ, ქართველი ვიყავი.

ინდოეთში დაბრუნების შემდეგ საქართველო იმ შეყვარებულივით მენატრებოდა, რომელიც შორს ცხოვრობს და მასთან ერთად გატარებული 4 დღე არ მეყო. მალევე დამირეკეს და „ცეკვავენ ვარსკვლავების“ ჟიურის წევრობა შემომთავაზეს. ვორჭოფობდი, არ მიყვარს ხალხის შეფასება, მაგრამ, როცა კონკურსანტობა მთხოვეს, სიამოვნებით დავთანხმდი. და იცით, რატომ? მინდოდა, კიდევ ერთხელ მეგრძნო ქართველების გულწრფელი სიყვარული. უმნიშვნელოვანესი პროექტები გვერდზე გადავდე და თბილისში ჩამოვფრინდი. საქართველო ხელგაშლილი შეყვარებულივით დამხვდა“, აცხადებს მსახიობი.